blog.satheeshkumar.in

Sithar koil

2011-04-16T09:58:00.001+05:30

Prime deity of kanjamalai sithar and perennial medicinal water makes this place a special one.

Books Exhibition @ Thanjavur

2011-02-06T12:44:00.001+05:30

I was thrilled to see an advertisement in tamil daily today which was of 7 x 7 cm size on the third page announcing the last day of Book Exhibition organised by Rotary Club. But when I went there, was stunned because only one shop for kids was there! Totally disapointed!

But there was some surprise in the next two rows with full of books. Some good pubs stalls were there, karpagam, manivasagar, NCH, kilakku, Ramakrishna Mission, Isha foundation, nakeeran, etc...

Not bad for the number of visitors there. Primarily the publicity was very less! At my home nobody was knowing till I saw it in the news paper. If proper publicity was there, definitely there would have been lot of crowd.

Finally bought a book of Rasu. Poundurai on 'Thanjai Rajarajeshwaram Vimana Thirukatrali kattida kalai marabu' and a wall hung soft board for my daughter.

Some glimpses from there...

இனி வரும் காலம் இனிய காலம்...

2011-01-01T07:50:00.000+05:30

எத்தனையோ புதுவருடங்கள் தமிழ், தெலுங்கு, மலையாளம், மராத்தி... என இந்தியாவில் கொண்டாடப்பட்டாலும், உலகளவில் துவங்கும் இந்த நாளையும் நாம் இனிதே ஏற்றுக் கொண்டோம். வந்தாரை வாழவைப்பதோடு அவர்தம் வழக்கங்களையும் வாழவைப்பதில் நாம் பெருமை கொள்கிறோம்.

குறைகள் இல்லாத மனிதனே இல்லை, அது போல் குறைகள் இல்லாத நாட்களும், வாரங்களும், மாதங்களும், வருடங்களும் இல்லை! கடந்த வருடத்தின் குறைகளை ஏற்றுக் கொள்வோம், செய்த தவறுகளை மீண்டும் செய்வதில்லை என்று மனதில் பதிய வைப்போம். அற்புதமான நினைவுகளை அசை போட்டு, புது வருடம் இன்பமாய் இருக்க இறைவனைப் பிரார்த்திப்போம்.

எண்ணங்கள் மனிதனை மேம்படுத்தும், கலாம் சொன்னது போல் கனவு காண்போம். நாம் யாவரும் மேம்பட வேண்டுமென்று, வல்லமை பெற வேண்டுமென்று, இல்லம் தோறும் மகிழ்ச்சி பெருக வேண்டுமென்று, நல்லதொரு அரசு அமையவேண்டுமென்று, பசுமை அதிகரித்து பஞ்சம் வரவேக் கூடாதென்று, மாதம் மும்மாரி பொழிய வேண்டுமென்று, இயற்கையை பாதுகாக்க வேண்டுமென்று, நம் பாரம்பரியம் காக்கப் படவேண்டுமென்று, நம் வரலாற்றை ஒவ்வொருவரும் அறிந்து செயல் பட வேண்டுமென்று, மனித வாழ்வில் சமநிலை வரவேண்டுமென்று...

இது போன்ற சிந்தனைகள் வரும் பொழுது நினைவிற்கு உடனே வருபவர் நம் மகாகவி பாரதி...

பாரத நாடு பழம்பெரும் நாடு
நீரதன் புதல்வர் இந்நினைவகற்றாதீர்...என்றும் மன்னும் இமய மலையெங்கள் மலையே
மாநிலம்மீது இதுபோல் பிரிதில்லையே...

என்று நம் தாய்நாட்டின் மீது பெருமை கொண்டு...

கல்விச் சிறந்த தமிழ்நாடு- புகழ்க்
கம்பன் பிறந்த தமிழ்நாடு- நல்ல
பல்வித மாயின் சாத்திரத்தின் மணம்
பாரெங்கும் வீசும் தமிழ்நாடு...

என்று தமிழ்நாட்டின் புகழ் பாடி...

பெற்றத் தாயும் பிறந்த பொன்னாடும்
நற்றவ வானினும் நனி சிறந்தன

என்றும் பெருமை கொண்டு...

அரும்பு வியர்வை உதிர்த்து
புவிமேல் ஆயிரம் தொழில்செய்து வாழ்வோம்,வெட்டுக் கனிகள் செய்து தங்க முதலாம்
வேநிபல பொருளுள் குடைந் தெடுப்போம்,

இதை விட ஆக்கப்பூர்வமாக யார் கூறமுடியும்!

இந்தப் புதிய வருடம் மிகவும் இனியதாய், இன்பம் அளிப்பதாய், முன்னேற்றங்கள் நிறைந்ததாய் யாவர்க்கும் இருக்க வேண்டுமென இறைவனை வேண்டி அனைவருக்கும் இனிய புத்தாண்டு வாழ்த்துக்களை கூறிக்கொள்கிறேன்.

வாழிய செந்தமிழ்; வாழ்க நற்றமிழர்!வாழிய பாரத மணித்திரு நாடு!

பல்லவக் கலைச் செல்வங்களைத் தேடி ஒரு பயணம் (பாகம் - 2)

2010-12-14T23:11:00.000+05:30

பணிச்சுமையாலும், இடமாற்றத்தினாலும், காலதாமதமாக பதிவதற்கு மன்னிப்பு கோரி பதிவின் இரண்டாம் பாகத்தை துவக்குகின்றேன்...

மண்டகப்பட்டு குடைவரையை பார்த்தபின் மீண்டும் சுமார் 6 கி.மீ அதே செஞ்சி விழுப்புரம் சாலையில் பயணித்து, அனந்தபுரம் வழியாக பனைமலையை அடைந்தோம். ஆஹா! என்ன ஒரு இரம்மியமான சூழலில் அமைந்திருக்கிறது இந்த ஆலயம்!

பல்லவ சிற்பக்கலைக்கு முன்னேற்றம் கொடுத்து அதனை அடுத்த நிலைக்கு கொண்டுச் சென்ற இராஜசிம்ம பல்லவனின் கற்றளிதான் இந்த பனைமலை தலகிரீஸ்வரர் ஆலயம். சிற்பங்களுக்கு மட்டுமல்ல ஓவியத்திற்கும் புகழ் பெற்ற ஒன்று. ஒரு புறம் பெரிய ஏரி, மறுபுறம் பசுமையான வயல்வெளி, நடுவில் குன்று அதன் மீது ஆலயத்தை அமைத்த இராஜசிம்மன் நல்ல ரசிகன்தான்!

மலையைப் பார்த்து சற்றே மலைத்துத்தான் போனோம். ஆனால் கண்ணில் தெரிந்த ஆலயமும் அதன் சிறப்பும் மேலே வா...வா... என்றழைப்பதாக தோன்றியதால் கிடைத்த புத்துணர்ச்சியில் இயற்கையழகை ரசித்துக் கொண்டே மேலே ஏறினோம்.

இதோ ஆலயம் நம் கண்முன்னே

அழகான சுனையில் அடுக்கடுக்காய் அலைகள்

இதோ ஆலயத்தின் அருகில் வந்துவிட்டோம்

கம்பீரமான விமானம்

வடபுறத் தோற்றம், இந்தச் சுற்றில் கருவறைக்கு வலப்புறம் வெளியே உள்ள அறையில்தான் உமையின் சிறந்த ஓவியம் அழிந்து வரும் நிலையில் உள்ளது

இதோ அந்த ஓவியத்தின் காட்சி, சிவ நடனம் தெரிகிறதா என்று பாருங்கள்

அறையின் மேற்புறம்

ஒய்யாரமாய் நிற்கும் உமை

உமையின் மேற்பாதி உருவம்

கீழ்ப்பாதி உருவம்

மற்றுமொரு ஓவியம்

யானைபோல் தெரியும் உருவம்

இடப்புற துவாரகர்...ம்ம்ம் தலைக்குப் பின் தெரியும் பல்லவர் சிறப்பு சூலம் குறிப்பிடத்தக்கது (கீழே உள்ள சூலம் யாரோ திருஷ்டிக்காக வைத்திருக்கிறார்கள் போலும் :-) )

வலப்புற துவாரபாலகர்

நான்முகன்

கருவறையின் உள்ளே லிங்கத்திற்கு பின்புறம் உள்ள சோமஸ்கந்த புடைப்புச் சிற்பம்

அழகிய வரிவடிவமுடைய கிரந்த கல்வெட்டு

ஒய்யாரமாய் அமர்ந்திருக்கும் அலைமகளுடன் திருமால்

இங்கிருக்கும் சிற்பங்களையும், ஓவியங்களையும் பற்றி விளக்க பலப் பதிவுகள் வேண்டும். அந்தப் பணியை நம் poetryinstone-டம் விட்டு விடுவோம்.

இயற்கையை ரசித்துக் கொண்டிருக்கும் நம் அமெரிக்க வானொலி அறிவிப்பாளர் ஸ்ரீ ஸ்ரீ

குன்றின் மீதிருந்து கண்ணுக்கு குளிர்ச்சியான காட்சியை அனுபவிக்க கொடுத்து வைத்திருக்க வேண்டுமே!

ஆதவன் தன் கடமையை முடித்துக் கொள்ளும் காட்சியை இரசித்துக் கொண்டே சென்னையை நோக்கி பயணிக்கின்றோம்

கலையுணர்வு கொண்டு இரசித்திடுங்கள், கருணையுள்ளம் கொண்டு அழிவிலிருந்து காக்க உதவிடுங்கள்.

பல்லவக் கலைச் செல்வங்களைத் தேடி ஒரு பயணம் (பாகம் - 1)

2010-06-26T19:45:00.000+05:30

பொன்னியின் வரலாற்றுப் பேரவை நண்பர்களுடன் பல்லவர்களின் குடைவரைக் கோயில்களையும், கற்றளியையும் தேடி ஜூன் மாதம் 19-ஆம் தேதி ஒரு பயணம் மேற்கொண்டோம். காலை 7 மணிக்கு மயிலாப்பூரில் பயணத்தைத் தொடங்கிய எங்களது வாகனம் ஷஷ்வந்த் மற்றும் சவுரப் உடன் 7.45 மணிக்கு கத்திப்பாரவை வந்தடைந்தது. வாகனம் வருவதற்கு முன்னரே எங்களது வழிகாட்டியும் பொன்னியின் செல்வன் வரலாற்றுப் பேரவையின் குருவுமான திரு. சிவபாதசேகரன் (SPS)அவர்கள் எங்களுக்கான மதிய உணவுகளுடனும், நொறுக்கு தீனிகளுடனும், பொவண்டோ மற்றும் தண்ணீர் பாட்டில்களுடனும் வந்து வழியனுப்பத் தயாராக இருந்தார். வாகனம் வந்தவுடன் நான், சிங்கை விஜய் குமார், அர்விந்த், ராமன், ஸ்ரீ ஸ்ரீ, சௌமியா, சதீஷ்குமார் அருணாச்சலம் ஆகியோர் வாகனத்தில் ஏற திரு. SPS அவர்கள் வழியனுப்பி வைக்க எங்கள் பயணம் தொடர்ந்தது. இடையில் பெங்களூரில் இருந்து வந்த ஸ்ரீராம் எங்களுடன் தாம்பரத்தில் இணைந்து கொண்டார்.

அறிமுகப் படலம் முடிந்து பல்லவர்களின் சிற்பங்களைப் பற்றிய கேள்வி பதில்கள் ஏராளமாக பரிமாறிக் கொள்ளப்பட்டன. குறிப்பாக ஸ்ரீஸ்ரீ, சவுரப் மற்றும் ஷஷ்வந்த் ஆகியோர் ஏராளமானக் கேள்விகள் கேட்டனர். அவை யாவற்றிற்கும் விஜய் அருமையான விளக்கங்களுடன் பதிலளித்து வந்தார் அவருக்கு உறுதுணையாக அர்விந்த் அவர்களும் பல மேற்கோள்களுடன் விளக்கம் அளித்து வந்தார்.

அதில் ஒரு சில கேள்விகள், ஏன் இப்பொழுது நாம் காணும் பழங்காலக் கோயில் கி.பி. ஆறாம் நூற்றாண்டிற்குப் பின் இருக்கின்றன? ஏன் அதற்கு முற்பட்ட காலத்தின் கோயில்கள் இல்லை? இதற்கு பதிலாக, மண்டகப்பட்டு குடைவரைக் கோயில் உதாரணமாக காட்டப் பட்டது. “செங்கல், உலோகம், மரம், சுதை போன்ற வழக்கமான கட்டுமானப் பொருட்கள் இல்லாமல், நான்முகன், சிவன், திருமால் ஆகிய மூன்று தெய்வங்களுக்கும் விசித்திரச் சித்தன் என்னும் அரசனால் எடுக்கப்பட்ட இலக்ஷிதக் கோயில்” என்று பல்லவ மன்னனால் வடிக்கப் பட்ட கல்வெட்டு கொண்டு இதற்கு முன்னர் இருந்த ஆலயங்கள் அழியக் கூடிய பொருட்களால் கட்டப் பட்டதால் தான் அவற்றை நாம் காண முடியவில்லை என்று பதிலளிக்கப்பட்டது. அது மட்டுமின்றி நம் முன்னோர்கள் கற்களை வீரக்கல், நடுக்கல் மற்றும் முதுமக்கள் புதைக்கப்பட்ட இடத்தை குறிப்பிட மட்டும்தான் பயன்படுத்தினர் என்றதொரு ஊகம் இருப்பதாலும் நமக்கு 6ஆம் நூற்றாண்டுக்கு முற்பட்ட கோயில்கள் கிடைக்காமல் இருந்திருக்கலாம் என்றும் விவாதிக்கப் பட்டது. இடையிடையே ஸ்ரீஸ்ரீ அவர்கள் தாங்கள் அமெரிக்காவில் நடத்திய பொன்னியின் செல்வன் நாடகத்தின் புகைப்படங்களைக் காட்டி விளக்கி எங்களை உற்சாகப்படுத்தி வந்தார்.

இது மட்டுமன்றி, சிற்பங்களுக்கான பாறைகளின் விதங்கள், அவை உருவாகும் விதம், பல்லவர்கள் பாறைகளைத் தேர்ந்தெடுத்த இடம், பல்லவக் குடைவரைகள் ஜெயின் குடியிருப்புகளின் அருகாமை என பற்பல் விவாதங்கள் நடந்தன. இந்தக் குழுவில் இருந்த ஒவ்வொருவரும் காட்டிய ஆர்வம், விவாதத்தில் பங்கு கொண்ட விதம் மிகவும் ஆச்சரியம்!

இந்த விவாதங்களுக்கிடையே நாங்கள் முதலில் சிங்கவரம் நோக்கி பயணித்து வந்தோம். எங்களது பயணத்தில் இன்று நாங்கள் பார்க்கப் போவதாக முடிவு செய்திருந்த இடங்கள் சிங்கவரம், தளவானூர், மண்டகப்பட்டு, பனைமலை. இவற்றை அர்விந்த் அவர்கள் முன்கூட்டியே காலநேரத்திற்கு தகுந்தவாறு முடிவு செய்து வைத்திருந்தார்.

செஞ்சியை அடுத்து மேலச்சேரி, வடபாலை செல்லும் வழியில் சுமார் 4 கி.மீ. தூரத்தில் உள்ள சிங்கவரத்தை சுமார் 11 மணியளவில் அடைந்தோம். சுட்டெரிக்கும் ஆதவன் கோபக்கனலை வீசினாலும் மலைமேல் ஏறுவதற்கு எங்களுக்கு பெரிய மலைப்பாக இருக்கவில்லை ஏனென்றால் பல்லவனின் கலையை பார்க்கும் ஆர்வம் மேலோங்கி இருந்ததோடு இதுதான் முதல் ஆலயம் என்பதாலும். ஆனால் வந்தது ஒரு சோதனை, ஆலயம் பூட்டிக் கிடந்தது! சாவி அர்ச்சகரிடம்! அவரைத் தேடி பல இடத்தில் அலைந்து கைபேசி எண்ணைக் எப்படியோ கண்டுபிடித்து அழைத்தால் “நான் திருவண்ணாமலை சென்று கொண்டிருக்கிறேன் இப்பொழுது வரமுடியாது” என்று சொல்லிவிட்டார். பின்னர் விஜய் மற்றும் அர்விந்த் அவரிடம் பேசி பின்னர் அவரது மேலதிகாரியைத் தொடர்பு கொண்டு எப்படியோ அவரை வரவழைக்க ஏற்பாடு செய்ததும் அவர் இல்லத்திற்கு வந்து அழைத்துச் செல்ல அனுமதி தந்தார். தாமதமானாலும் சென்று அழைத்து வந்த பின்னராவது நமக்கு வேண்டியதெல்லாம் கிடைக்குமென்றால் (அதுதாங்க புகைப்படம் எடுக்க அனுமதி) அதுவும் இல்லை. தீபாராதனைக் காட்டிவிட்டு சில விளக்கங்கள் கொடுத்து விட்டு வெளியேறச் சொல்லிவிட்டார்.

நமது விஜய் அவர்கள் என்னவெல்லாமோ செய்து பார்த்தார் ஆனால் ஒன்றுக்கும் அந்த பட்டர் செவிசாய்ப்பதாய் இல்லை. என்ன செய்வது ஏராளமான ஆலயங்களில் இந்தப் பிரச்சினை எங்களுக்கு தொடர்ந்து வந்து கொண்டேதான் இருக்கிறது. ஆலயத்தில் புகைப்படம் எடுக்கக்கூடாது என்பது என்னதான் கொள்கையோ!!!

இதோ சிங்கபுர ஆலயத்தோற்றம், இந்தக் கோபுரங்கள் மண்டபங்கள் பிற்காலத்தில் கட்டப்பட்டவை, உள்ளிருக்கும் குடைவரை மட்டும்தான் பல்லவர்காலம்.

இந்தப் படிகளில் ஏறுவதற்குள் தொண்டை வரண்டு தலைச் சுற்றலே வந்துவிடும் போலிருந்தது, நம்முடைய இக்காலப் பணியால் கிடைத்த வரம்...

இதோ நம் நண்பர்கள் ஆலயம் திறப்பதற்காக வாசலில் தவம் கிடக்கின்றனர்...

ஆலயத்தின் உட்புறம்...

ஆலயத்தின் உட்புறம் அமைந்துள்ள நீர் நிறைந்த தடாகம்...

ஒரு பழமையானத் தூணை மறைத்து செய்யப்பட்டிருக்கும் புதிய பணி...

தாயார் சன்னதிக்குள்ளே மறைத்து வைக்கப்பட்டிருக்கும் கொற்றவை (அனுமதி இல்லையே அப்புறம் எப்படி இந்தப் படம்?? சுட்ட படம்தான்)

இனிதான் மிக மிகப் பெரிய அனந்தசயனப் பெருமாள் எனும் இரங்கநாதரைக் காணப்போகிறோம். இவர் 24 அடி நீளமானப் பெருமாள், இவருக்கு அடுத்துதான் திருமயம் மற்றும் திருவரங்கநாதர்கள் வருகின்றனர். இவருடைய மார்பில் மற்ற இடங்களில் போல் அல்லாமல் திருமகள் தனது முழு உருவத்தோடே செதுக்கப்பட்டிருக்கிறாள். இதோ நீங்கள் பார்த்த கொற்றவையும் இனி நீங்கள் பார்க்கப் போகும் அரங்கநாதரும்தான் பல்லவர்களால் கல்லில் குடைவரையோடு சேர்த்து வடிக்கப்பட்டவர்கள்.

அரங்கரை முழு உருவமாக காட்டமுடியாமைக்கு வருந்துகிறேன், அதற்கு அனுமதி எங்களுக்கு கிடைக்கவில்லை. அப்படியே கிடைத்திருந்தாலும் ஒரு கைதேர்ந்த புகைப்படக் கலைஞரால்தான் அது சாத்தியப்படும். கிடைத்தவற்றை பகிர்ந்து கொள்கிறேன்.

பாதமலரில் இருந்து தொடங்குகிறது, ஆஹா! என்னவொரு பிரமிக்க வைக்கும் உருவம்!!!

மார்பில் தெரிகிறதா மகாலட்சுமி...

குடைவரைக்கு வெளியில் இருக்கும் மண்டபத்தில் உள்ள துவாரபாலகர்கள். இவர்களைப் பார்த்தால் பல்லவச் சிற்பம் போல் இல்லை, எனினும் விஜய் அவர்களின் பதிவுக்காக காத்திருப்போம்.

இந்த ஆலயத்தில் இருந்து நாங்கள் வெளியே வரும் பொழுது நேரம் மதியம் 2.00ஐ தாண்டி விட்டது. அங்கிருந்து கிளம்பி எங்களுடன் வந்த பட்டரை செஞ்சியில் இறக்கிவிட்ட பின் செஞ்சி விழுப்புரம் சாலையில் 13ஆவது கி.மீ.ரில் இடப்பக்கம் சுமார் 5 கி.மீ பயணம் செய்து தளவானூரை அடைந்தோம். அற்புதமான வயல்வெளி சூழ்ந்த இந்தக் குடைவரையை இரசித்து விட்டு அங்கேயே மதிய உணவையும் முடித்துவிட்டு வந்த வழியே திரும்பி மேலும் செஞ்சி சாலையில் பயணம் செய்து சுமார் 6 கி.மீ தொலைவில் உள்ள மண்டகப்பட்டு குடைவரையை அடைந்தோம். இந்தக் குடைவரைகளைப் பற்றிய தகவல்கள் ஏற்கனவே www.poetryinstone.in தளத்தில் உள்ளமையால் அவற்றின் சுட்டிகளை மட்டும் தருகிறேன்.

http://www.poetryinstone.in/lang/en/2009/04/23/shatrumalleswaraalayam-a-splendid-creation-of-mahendra-pallava.html
http://www.poetryinstone.in/lang/en/2009/05/11/makara-thoranas-an-interesting-link-between-pallavas-and-cambodia.html
http://www.poetryinstone.in/lang/en/2009/05/13/was-this-the-inspiration-behind-mahendra-pallavas-sculptural-quest.html
http://www.poetryinstone.in/lang/en/2009/08/12/the-mystery-behind-the-horns-of-pallava-door-guardians.html
http://www.poetryinstone.in/lang/en/2008/08/31/what-a-mace-what-a-mace.html

பனைமலையைப் பற்றிய படங்களையும் செய்திகளையும் இந்தப் பதிவின் இரண்டாவது பாகத்தில் காணலாம்.

நண்பர் அர்விந்த் வெங்கட்ராமனின் அருமையான புகைப்படங்களை இங்கே காணலாம்:
http://picasaweb.google.com/arvind.venkatraman/Singhavaram#

தீபாவளி நல்வாழ்த்துக்கள்

2009-10-15T15:19:00.000+05:30

பட படவென பட்டாசுகள் வெடிக்க
சட சடவென மத்தாப்புகள் பொரிய
தித்திக்கும் இனிப்புகளால் இல்லம் நிறைய
பளபளக்கும் தீப ஒளியில் உள்ளம் மலர
மங்கள வாழ்த்தொலி எங்கும் பரவட்டும்
மட்டற்ற மகிழ்ச்சியில் மனம் திளைக்கட்டும்
தீப ஒளி திருநாளில் எல்லோரும் எல்லா நலமும்
வளமும் பெற்று வாழ்க வாழ்க என்று வாழ்த்துவோம்...

இவளே...இவளே...பூங்குழலி - பேரா. அசீரா

2009-06-21T21:53:00.000+05:30

புல்லின் பக்கக் கத்திமுனை, புகையின் கீழே எரிகங்கு
செல்லக் காற்று, காட்டுமலர், திரைகொள் கடலின் தெம்மாங்கு
கல்லுக் குள்ளே பனி ஊற்று; காற்றுப்புரவி; உள்ளன்பின்
எல்லைச் சீமை; இளநெஞ்சம்; இவளே இவளே பூங்குழலி.

அச்சத்தெதிரி; அறிவாளி, அலையும் கடலின் செல்லமகள்
கொச்சை எண்ணம் இல்லாதாள்; குனிந்து பார்க்கத் தெரியாதாள்
உச்சி மேகக் கூந்தலினை உலுக்கிப் பார்க்க எண்ணுபவள்
எச்சரிக்கை விழிப்புடையாள், இவளே இவளே பூங்குழலி.

புயலைச் சீறும் புயலாவாள்; பொங்கும் கடலில் ஒயிலாவாள்
முயலைப் போன்ற மென்மையினால்; முரட்டுச் சிங்கத் தன்மையினாள்
கயல்கள் புரளும் கடலினிலே கங்குல் பகலாய்ச் சுற்றுபவள்
இயலும் நன்மை செய்திடுவாள் இவளே இவளே பூங்குழலி.

ஓலக்கடலை இசையதனால் ஓய்வெடுக்கச் செய்கிறவள்
வாலைக்குமரி; துடுப்பதனை வலிப்பாள்; வலியாக் கரமுடையாள்
மேலும் வியப்பாய்க் கதையினிலே விரியும் மனிதப் படையலிலே
ஏலம் போல மணக்கிறவள் இவளே இவளே பூங்குழலி.

ஓடக்காரி; பிசாசுகளின் உறவுக்காரி; வெகுசூரி
ஆடும் அலையின் உச்சியிலே அழகாய் ஊஞ்சல் ஆடுபவள்
ஊடும் நெஞ்சப் பிழிவதனை ஓங்கும் இசையாய்ப் பொழிகிறவள்
ஈடுசொல்ல முடியாதாள் இவளே இவளே பூங்குழலி.

பொன்னியின் செல்வன் நெஞ்சை அசைக்கும் பூவே பூங்குழலி - அவன்
புன்னகைக்காகப் புயலாய்ப் பாயும் புனிதம் பூங்குழலி
கன்னிமனத்தில் காதல்சுமக்கும் கனலேபூங்குழலி - நெஞ்சக்
கல்மலருள்ளே கனவுத்தேனைக் காக்கும் பூங்குழலி.

ஆடவர்தம்மை ஆட்டிப் படைக்கும் அழகு பூங்குழலி - அன்பன்
அருள்மொழிவர்மன் முன்னேஊமை ஆகும்பூங்குழலி
காடும்கடலும் நதியும்இருளும் கடக்கும்பூங்குழலி - சோம்பல்
கண்டே அறியாக் கற்பனைக்காரி கவிதைப்பூங்குழலி.

சமுத்ரகுமாரி என்றுதிரியும் சக்திபூங்குழலி - தீய
சக்திகள்தம்மை அடக்கி ஒடுக்கும் சாட்டைபூங்குழலி
குமுறும்கடலில் கொட்டம்அடிக்கும் குயிலே பூங்குழலி - ஓரக்
கோடிக்கரையின் கோயில்தீபக் கொழுந்தேபூங்குழலி.

அரியணைஏறும் ஆசைகொண்ட அன்பேபூங்குழலி - அந்த
ஆசைஉண்மை ஆகஅடைந்த ஆக்கம்பூங்குழலி
ஒருபயம்இன்றி உலவித்திரியும் உயர்வேபூங்குழலி - கதையின்
ஓட்டந்தன்னை உந்தும் விசையின் ஊக்கம்பூங்குழலி.

சரித்திர நாயகன் உயிரினைக் காத்தனள்
சக்தியின் வடிவாகினள்
தரித்திரம் இல்லாதோர் நெஞ்சினைக் கொண்டனள்
சத்திய நிலையாயினள்
அரியணை ஏறினாள் அரசியாய் மாறினாள்
அமுதனின் துணைவியானாள்
திரையெழும் சமுத்திர குமாரியாம் பூங்குழல்
தேவியைப் போற்றுகின்றோம்.

நன்றி: எழுத்துலகில் அமரதாரா, வானதி சிறப்பு வெளியீடு

தஞ்சை சிவகங்கை குளம்தான் தளிக்குளமா…

2009-05-31T19:34:00.000+05:30

தஞ்சையில் பெரியகோவிலுக்கு வடக்கே அமைந்துள்ள சிவகங்கை பூங்காவில் அமைந்துள்ள குளம்தான் இந்த சிவகங்கை குளம். சிதம்பரத்தில் உள்ள ஒரு புனிதம் வாய்ந்த குளத்திற்கும் இதே பெயர் உள்ளது. இந்த சிவகங்கை குளத்திற்கு என்ன அப்படி ஒரு விஷேசம், இதை இங்கே பதிவதற்கு என்ன காரணம் என்று சற்று பார்ப்போம்.

பொன்னியின் செல்வனில் தஞ்சை தளிக்குளத்தார் ஆலயம் என்று ஒரு ஆலயத்தை படித்திருக்கிறோம் அல்லவா, அந்த ஆலயம் எங்குள்ளது என்று தேடினேன். அவ்வாறு தேடும் பொழுது உள்ளூர்வாசிகள் பலரிடம் விசாரித்தேன், அப்பொழுது ஏராளமானோர் காட்டியது இந்த சிவகங்கை குளத்தையும் அதனுள் இருக்கும் சிவலிங்கத்தையும், நந்தியையும் தான். இது உண்மையா என்று பல நூல்களில் தேடிப்பார்த்தேன், ஆனால் எதிலும் குறிப்பேதும் கிடைக்கவில்லை. சரியான நூலை நான் தேடவில்லையோ என்னவோ! ஆனால் இணையத்தில் தேடியதில் இரண்டு வலைத்தளங்களில் உள்ள செய்தி இதை உறுதி செய்தன, அவற்றை கீழே உள்ள இணைப்புகளில் காணலாம்.

http://www.shaivam.org/siddhanta/sp/spt_v_thanjaithalikkulam.htm

http://www.thevaaram.org/thirumurai_1/koil_view.php?koil_idField=37

பாடல் :

அஞ்சைக் களத்துள்ளார் ஐயாற் றுள்ளார்
ஆரூரார் பேரூரார் அழுந்தூ ருள்ளார்
தஞ்சைத் தளிக்குளத்தார் தக்க ளூரார்
சாந்தை அயவந்தி தங்கி னார்தாம்
நஞ்சைத் தமக்கமுதா வுண்ட நம்பர்
நாகேச் சரத்துள்ளார் நாரை யூரார்
வெஞ்சொற் சமண்சிறையி லென்னை மீட்டார்
வீழி மிழலையே மேவி னாரே

பெருமானார் விடத்தைத் தமக்கு அமுதமாக உண்டு நம்மைப் பாதுகாத்தமையால் நம்மால் விரும்பப்படுபவராய்க் கொடிய சொற்களை உடைய சமணசமயச் சிறையிலிருந்து என்னை மீட்டவ ராய், அஞ்சைக்களம், ஐயாறு, ஆரூர், பேரூர், அழுந்தூர், தஞ்சைத் தளிக்குளம், தக்களூர், சாத்தமங்கையிலுள்ள திருக்கோயிலாகிய அயவந்தி, நாகேச்சரம், நாரையூர் இவற்றில் தங்கி, வீழிமிழலையை விரும்பி வந்தடைந்தார்.

இதுதான் தளிக்குளத்தைப் பற்றி அப்பர் பெருமான் பாடிய பாடலும் அதன் விளக்கமும். சரி வாருங்கள் சிவகங்கை குளத்தையும் அதில் இருக்கும் சிவாலயத்தையும் பார்க்கலாம்.

இதோ சிவகங்கை குளத்தில் உள்ள ஆலயம், தளிக்குளத்தார் ஆலயமா?

இந்தப் படங்கள் பெரியகோவிலின் பக்கம் இருந்து எடுக்கப் பட்டவை

சிவகங்கை குளத்திற்கு அருகில் இருந்து எடுக்கப்பட்ட பெரியகோவிலின் படம்

தளிக்குளத்தார் ஆலயத்தின் மறுபுறத்தில் இருந்து எடுக்கப்பட்ட படம். குளத்தின் நடுவே இருக்கும் பாறையை பாருங்கள், செங்குத்தாக வெட்டியதுபோலல்லவா இருக்கிறது.

சிவகங்கை குளத்தின் மதில் சுவர்கள்...

இது உபயோகப்படுத்தப் படாத படித்துறை...

சிவகங்கை குளத்தின் வடமேற்குப் பகுதி...அப்பப்பா எவ்வளவு உயரமான சுவர்! உபயோகப்படுத்தப் பட்டிருக்கும் செங்கல்களில் வித்தியாசத்தைப் பாருங்கள். மேற்குப் பகுதியில் உள்ள செங்கற்கள் தற்கால செங்கல் போலுள்ளன, ஆனால் வடக்குப் பகுதியில் உள்ள செங்கல்கள் பழங்காலத்தில் உபயோகப் படுத்தப் பட்ட சிறியவகை செங்கற்களால் கட்டப்பட்டுள்ளன.

இது வடக்குப் புற சுவர்...(A massive retaining wall)

வடகிழக்குப் பகுதி...

மேற்குப் பகுதி சுவர்...

வடக்குப்புற சுவரில் ஒரு நீண்ட ஏணியும் அதில் வேலை செய்யும் ஆட்களும் தெரிகிறார்களா? எவ்வளவு பெரிய சுவர் என்று கற்பனை செய்து பாருங்கள்.

அட! இது என்ன படித்துறையா? நிச்சயமாக அந்த காலத்துப் படித்துறையாகத்தான் இருக்கவேண்டும். இதில் மன்னரும் அவர்தம் மக்களும் இறங்கி விளையாடி இருப்பார்களா? இல்லை இறைவன் இருக்கும் குளமென்பதால் புண்ணிய காரியங்களுக்கு மட்டும் உபயோகப்படுத்தி இருப்பார்களா!

இந்தக் குளத்தில் தற்சமயம் நீருள்ள காலத்தில் படகுசவாரி ஏற்பாடு செய்யப்பட்டுள்ளது சுற்றுலாத் துறையினரால். மேலும் விஞ்ச் எனப்படும் தொங்கு வாகனம் இங்குள்ள சிவாலயத்திற்கு எல்லா நாட்களிலும் இயங்குகிறது. எது எப்படியோ, இதுதான் தளிக்குளத்தார் ஆலயமா என்பது என்னால் உறுதி செய்ய முடியவில்லை. இந்த தேடலில் தாங்களும் இணைந்து கொள்ளலாமே!

ஐயன் குளம்

இந்த சிவகங்கை குளம் மற்றும் தளிக்குளத்தைப் பற்றிய தேடலில் கிடைத்தது தான் இந்த ஐயன் குளம். ஐயன் குளம் என்ற பெயர் எவ்வாறு வந்தது தெரியுமா? தஞ்சையில் நாயக்க மன்னர்களின் ஆட்சி நடந்த பொழுது, செவப்ப நாயக்கன், அச்சுதப்ப நாயக்கன் மற்றும் விஜய் ரெகுநாத நாயக்க மன்னர்களுக்கு அமைச்சராய் இருந்து அரும்பணியாற்றியவர் கோவிந்த தீட்சிதர். இவரை யாவரும் கோவிந்தய்யா என்று அழைப்பார்களாம். விஜய ரெகுநாத மன்னருக்கு அமைச்சராகவும், அரச குருவாகவும், நல்ல ஆலோசகராகவும் பணியாற்றிய கோவிந்தய்யாவின் பணிகளை பாராட்டி அம்மன்னன் அவர் பெயரில் கோவிந்தகுடி, கோவிந்த புத்தூர், ஐயன் பேட்டை, ஐயன் கடைவீதி, ஐயன் குளம், ஐயன் வாய்க்கால் என பலவற்றையும் ஏற்படுத்தினாராம். அதில் ஒன்றுதான் இந்த ஐயன் குளம்.

சரி, இந்த ஐயன் குளத்திற்கும் சிவகங்கை குளத்திற்கும் என்ன தொடர்பு என்று கேட்கிறீர்களல்லவா, சிவகங்கை குளத்தில் நீர் ஒரு குறிப்பிட்ட அளவிற்கு மேல் நிறைந்தால் அந்த நீர் ஐயன் குளத்திற்கு செல்வது போல் நிலத்தடி வாய்க்கால் (may be syphon action) வெட்டப்பட்டதாம் அந்த காலத்தில். இதோ என் நண்பர் தஞ்சை சீனிவாசபுரத்தைச் சேர்ந்த இராஜவர்மன் அவர்கள் அளித்த ஐயன் குளத்தின் படங்களை பார்ப்போம்.

ஒருவேளை இந்த நடுவில் இருக்கும் குழிதான் சிவகங்கை குளத்துக்கும், ஐயன் குளத்துக்கும் இணைப்பு தருகிறதோ...

கீழிருக்கும் படத்தில் மூலையில் துளை போல் ஒன்று நீட்டிக் கொண்டிருக்கிறதே அது தெரிகிறதா?

இப்பொழுது பாருங்கள்...

இப்பொழுது பாருங்கள்... அட இதென்ன நந்தி ஒன்று வாய்திறந்துகொண்டு இருப்பது போலல்லவா தெரிகிறது! உண்மைதான் மழைக்காலத்தில் நீர்பிடிப்பு பகுதியிலிருந்து வரும் நீர் இந்த துளையின் வழியாகத்தான் வரும் இந்த குளத்திற்கு. யார் கண்டது, ஒருவேளை சிவகங்கை குள நீர் கூட இதன் வழியாக வரலாம் அல்லவா? ஏனென்றால் இந்தக் குளம் இருக்கும் பகுதி சிவகங்கை குளத்தை விட தாழ்வான பகுதியில்தான் அமைந்துள்ளது.

மேலும் சீனிவாசநகர் இருக்கும் பகுதியில் ஒரு பெரிய ஏரியோ அல்லது குளமோ இருந்ததாகவும் அதன் அருகில் ஒரு சிவாலயமோ அல்லது விஷ்ணுவின் ஆலயமோ இருந்ததாக என் நண்பனின் பாட்டி கூறினார். இது பற்றியும் மேலும் தேடி வருகிறேன், தங்களுக்கு இதைப் பற்றி ஏதும் தெரிந்தால் பகிர்ந்து கொள்ளுங்கள்.

நூல் குறிப்பு: தமிழர் காசு இயல், நடன் காசிநாதன்

சிவகங்கை குளத்தைக் காட்டும் கூகுள் வரைபடம்

ஸ்தபதி திரு. உமாபதி ஆச்சார்யா அவர்களுடன் ஒரு சந்திப்பு

2009-05-15T12:55:00.000+05:30

கல்கியின் வாசகர்கள் யாவருக்கும் சிற்பி என்ற உடனே நினைவுக்கு வருவது ஆயனச் சிற்பியும் அவரது மல்லைக் கனவுகளும்தான். சிவகாமியின் சபதத்தில் சிற்பக் கலைக்கும், நாட்டியக் கலைக்கும் முக்கியத்துவம் கொடுத்த கல்கி பொன்னியின் செல்வனில் சோழர்களின் பெருமையையும், இராஜராஜ சோழனின் கலைத் தாகத்தையும் யாவரும் அறியும் படிச் செய்தார். பொன்னியின் செல்வனைத் தொடர்ந்து காவிரி மைந்தன் எழுதிய அனுஷாவெங்கடேஷ், சிவகாமியின் சபதத்தை தொடர்ந்து காஞ்சி என்ற ஒரு நாவல் எழுதுவதாக கேள்வி. கல்கி முடிக்காமல் விட்டுச் சென்ற ஆயனச் சிற்பியின் கனவுகளை இவர் நிறைவேற்றுகிறாரா என்று பொறுத்திருந்து பார்ப்போம். கல்கியின் எழுத்தால் கவர்ந்திழுக்கப்பட்டு உருவான பொன்னியின் செல்வன் யாஹூ குழுமத்தில் இணைந்திருக்கும் நாங்கள், பல்லவர்களும், சோழர்களும் வளர்த்து வந்த சிற்பக் கலையை சாதாரண மக்களும் அறிந்து போற்றச் செய்யவேண்டும் என்று செய்து வரும் முயற்சியில் உருவான ஒன்று இந்த சந்திப்பு.

கல்லிலே கலை வண்ணம் காட்டும் நண்பர் சிங்கை திரு. விஜயகுமார் (VJ) அவர்களின் வழிகாட்டுதலின் பேரில் கும்பகோணத்தில் வாழ்ந்து வரும் பாரம்பரியம் மிக்க ஸ்தபதி திரு. உமாபதி ஆச்சார்யா அவர்களை சந்திக்கும் வாய்ப்பு கிடைத்தது. பழக இனிமையான இவர், பரம்பரை பரம்பரையாய் தாங்கள் கற்று வரும் சிற்பக் கலையின் இரகசியங்களை, சிற்பங்கள் செதுக்கும் முறையை யாவரும் அறிய வேண்டும், இந்தக் கலையின் முக்கியத்துவத்தை உலகம் அறிய வேண்டும் என்று ஆவல் கொண்டு இந்தப் பேட்டியினை மனமுவந்து அளித்துள்ளார். அமைதியும் பக்தியும் தவழும் இவரது இல்லத்தில் நுழைந்த உடனேயே நாம் புனிதமானதொரு இடத்தில் இருக்கிறோம் என்று உள்மனது அறிவித்தது. அவரும் அவரது சகோதரர் திருவீழிநாதனும் பேசிய விதமும், அவர்களது ஓலைச் சுவடிகளையும், நூல்களையும் பாதுகாக்கும் விதமும், அவர்களது தொழில் கூடத்தை வைத்திருக்கும் விதமும் அதை மெய்பிப்பதுபோல் இருந்தது.

சிற்பசாஸ்திரம், சிற்பங்கள் செதுக்கும் முறை, சிற்பங்கள் செதுக்குவதற்கு முன் தயார் செய்யப்படும் ஓவியங்கள் ஆகியவற்றைப் பற்றி பல ஆச்சர்யமூட்டும் தகவல்களை நம்முடன் பரிமாறிக்கொண்டார். கற்சிற்பங்கள் மட்டுமின்றி உலோகத்தில் சிற்பங்கள் செய்வதிலும் தேர்ந்தவர்கள் என்று அறிந்துகொண்டேன் இந்த சந்திப்பில். மேலும் சிற்ப சாஸ்திரம் சம்பந்தப் பட்ட பல்வேறு ஆராய்ச்சிகளையும் மேற்கொண்டுள்ளார், இவர் ஆராய்ச்சிகள், தேடல்கள் வெற்றி பெற வேண்டும் அதனால் இந்தக் கலையின் மகத்துவத்தை உலகோர் யாவறும் அறிந்து பயன் பெறவேண்டும் என்று இறைவனை வேண்டிக் கொண்டு யாம் பெற்ற இன்பத்தை யாவரும் பெறவேண்டுமென இந்த வீடியோப் பதிவினை வழங்குகிறோம்.

பார்த்து மகிழுங்கள், மேலும் தங்களுக்கு சிற்பக் கலையில் இருக்கும் சந்தேகங்களை தவறாமல் எங்களுக்கு அனுப்புங்கள். தங்களுடைய வினாக்களை மிகுந்த ஆர்வத்துடன் எதிர்பார்த்து காத்திருக்கிறார் திரு. உமாபதி ஆச்சார்யா அவர்கள்.

Email : svprsk@gmail.com

பாகம் - 1

பாகம் - 2

பாகம் - 3

பாகம் - 4

மாற்று இணைப்புகள்:

http://video.msn.com/video.aspx?vid=07800101-9b77-4741-b9d0-e44444aae7b8

http://video.msn.com/video.aspx?vid=7bdfc790-9364-4154-9c27-cf23dfb76c18

http://video.msn.com/video.aspx?vid=96194b44-33a8-498c-a231-b9ab40663dcc

http://video.msn.com/video.aspx?vid=55ed9816-5a6a-4baf-832d-a837dbe858a4

திருவிற்கோலத்தில் பன்னிரு திருமுறை முற்றோதல்

2009-01-31T16:40:00.000+05:30

உலகெ லாம்உணர்ந் தோதற் கரியவன்
நிலவு லாவிய நீர்மலி வேணியன்
அலகில் சோதியன் அம்பலத் தாடுவான்
மலர்சி லம்படி வாழ்த்தி வணங்குவாம் - சேக்கிழார்

அரியும், பிரம்மனுமே முழுவதும் காணமுடியாத இறைவனை இவ்வுலகில் வாழும் சாதாரண உயிர்கள் உணர்ந்து போற்றிப் பாடுவது என்பது இறைவன் அருள் இருந்தால் மட்டுமே இயலும். அவ்வாறு ஈசனின் அருள்பெற்ற நல்ல உள்ளங்கள் பல வள்ளலார் வழிபாட்டு மன்ற ஆன்ம நேயக் குழுமம் என்று அரியதொரு குழுவை உருவாக்கி, பன்னிரு திருமுறைகளையும் தங்கள் வாழ்வில் எத்தனை முறை முடியுமோ அத்தனை முறைப் பாடி பரமனின் அருள் பெற்றே தீருவோம் என்று கங்கனம் கட்டிக் கொண்டு திருமுறைகளை பல அன்பர்கள் இல்லங்களிலும் சென்று ஓதி வருகின்றனர்.

இது நடைபெறுவது சென்னைக்கு அருகே கடம்பத்தூரில் இருந்து சுமார் 10 கி.மீ தொலைவில் உள்ள கூவத்தில். கூவம் என்ற உடனே நினைவிற்கு வருவது துர்நாற்றம் வீசிக் கொண்டிருக்கும் சென்னையின் ”புனித” நதி கூவம் தான். ஆனால் அதுவல்ல இந்த கூவம், திருவிற்கோலம் என்ற அழகான பொருள் பொதிந்த பெயர் கொண்ட ஊர் இன்று கூவம் என்றழைக்கப் படுகிறது. திரிபுரம் எரித்த காலத்தில் மேருமலையாலான வில்லை கையில் பிடித்த கோலத்தில் ஈசன் நின்ற இடமாதலின் திருவிற்கோலம் என பெயர் பெற்றது.

இந்த ஊரில் உள்ள புகழ் பெற்ற ஆலயத்தின் இறைவன் திரிபுரசுந்தரி உடனுறை திரிபுராந்தகர் (திருவிற்கோல நாதர்). இங்குள்ள தீர்த்தத்திற்கு அச்சிறுகேணி மற்றும் கூபாக்கினி தீர்த்தம் என்று பெயர். ஒரு விசித்திரம் என்னவெனில் இந்த குளத்திலோ அல்லது அதைச் சுற்றியிருக்கும் வயல்வெளிகளிலோ தவளைகளே கிடையாதாம், வேறு எங்கிருந்தாவது பிடித்துக் கொண்டு வந்து விட்டால் கூட உடனே ஓடிவிடுமாம், இது அந்த அக்கினி தீர்த்தத்தின் மகிமை போலிருக்கிறது. கூபாக்னபுரி என்ற பெயரும் இந்த ஊருக்கு உண்டு. இந்த கூபாக்னபுரிதான் பின்னர் கூவம் என்று வழங்கலாயிற்றோ!

நண்பர் திரு. பாலசுப்பிரமணியத்தின் இல்லத்தில் நடந்த திருமுறை முற்றோதல் விழாவினை இந்தப் பதிவில் கண்டு களிப்போம்.

இதோ தங்கள் முன்னே திரிபுராந்தகர் ஆலய கோபுரம்

ஐயன்நல் லதிசயன் அயன்விண் ணோர்தொழும்
மையணி கண்டனார் வண்ண வண்ணம்வான்
பையர வல்குலாள் பாகம் ஆகவும்
செய்யவன் உறைவிடம் திருவிற் கோலமே.

இறைவர் யாவற்றுக்கும் தலைவர். பல பல வேடம் கொள்ளும் அதிசயர். பிரமனும், மற்றுமுள்ள விண்ணோர்களும் தொழுகின்ற மை போன்ற இருண்ட கண்டத்தர். நல்ல வண்ணமுடைய, பாம்பின் படம் போன்ற அல்குலையுடைய உமாதேவியைத் தம் திருமேனியில் ஒரு பாகமாகக் கொண்டு செம்மேனியராய் அவர் வீற்றிருந்தருளும் இடம் திருவிற்கோலம் ஆகும்.

மேலுள்ள பாடலில் சம்பந்தர் குறிப்பிட்டுள்ளது போல் மழை, வெள்ளம் வருமுன்னே இவ்வாலய இறைவன் மீது வெள்ளை நிறம் படருமாம், அது போல் யுத்தம் நிகழுமாயின் செம்மை (சிவப்பு) நிறமும் தோன்றுமாம். ஆனால் இந்த மாற்றங்கள் தற்சமயம் நிகழ்வதில்லை என்று கூறுகிறார்கள்.

ஆடல்வல்லான் சந்நிதி

பன்னிரு திருமுறைகளையும் இறைவன் பாதத்தில் வைத்து ஈசனின் ஆசி பெற்று ஆலயத்தை வலம் வரும் அன்பர்கள்

ஆகா! பயபக்தியோடு பாதபூசை செய்து ஓதுவார்களையும் பன்னிரு திருமுறைகளையும் வரவேற்கின்றனர்

விடைக் கொடியேற்றத்துடன் தொடங்கும் முற்றோதல்

விடையேறும் செல்வனை வணங்கி அவன் அருளாலே அவன் தாள் வணங்கி அண்ணலை போற்றி நாயன்மார்களால் பாடப்பெற்ற பாடல்களை பாடும் பணி தொடங்குகிறது

குழந்தைகளும் பெரியோர்களும் சூழ முற்றோதல் ஆரம்பமாகிவிட்டது
என்ன தவம் செய்தார்கள் இவ்வரிய நிகழ்ச்சியில் பங்கேற்று இறைவனருள் பெறுதற்கு!

இந்த நிகழ்ச்சியை தலைமையேற்று நடத்த வந்திருக்கும் காஞ்சீபுர தொண்டை மண்டல ஆதீனகர்த்தர், சீலத்திரு. திரு அம்பல ஞானப்பிரகாச தேசிக பரமாச்சாரிய சுவாமிகள்

ஆதீனகர்த்தரின் அருளுரை, அருகே வலது புறம் கண்மூடி அருளுரையில் ஆழ்ந்திருக்கும் நண்பர் பாலசுப்பிரமணியம்முற்றோதலின் ஒரு பகுதி முடிந்து இறைவனுக்கு ஆராதனையும் நடைபெற்றாயிற்று

நண்பருக்கு சிவதீட்சை வழங்கிய அவரது குரு அனைவருக்கும் ஆசியளித்து பரமசிவனின் பிரசாதத்தை வழங்குகிறார்

மண்ணின் மிசை வான்பொய்த்து நதிகள் தப்பி
மன்னுயிர்கள் கண்சாம்பி உணவு மாறி
விண்ணவர்க்குஞ் சிறப்பில்வரும் பூசை யாற்றா
மிக்கபெரும் பசியுலகில் விரவக் கண்டு
பண்ணமரும் மொழியுமையாள் முலையின் ஞானப்
பாலறா வாயருடன் அரசும் பார்மேல்
கண்ணுதலான் திருநீற்றுச் சார்வி னோர்க்கும்
கவலைவரு மோஎன்று கருத்திற் கொண்டார்.

இம்மண்ணுலகில் மழை மறுத்ததனால் ஆறுகளில் பருவவெள்ளம் பாயாது தவறி, அது காரணமாய் உலகத்து உயிர்கள் வருந்தி, உணவின்றி நின்றமையால், தேவர்களுக்கும் சிறப்பு வழி பாடுகளும் நாள்வழிபாடுகளும் செய்யப்படாமல் மிக்க பெரும் பசியின் கொடுமை உலகில் பொருந்திய நிலையைக் கண்டு, பண் பொருந்திய சொல்லையுடைய உமையம்மையாரின் கொங்கையின் பால் நீங்காதவாயினரான பிள்ளையாருடன் திருநாவுக்கரசரும் `உலகில் நெற்றிக் கண்ணரான திருநீற்றுச் சார்புடைய தொண்டர் களுக்கும் கவலை வருமோ?' என்று தம் உள்ளங்களில் எண்ணினர்.

நம்மவர்களுக்கு பசியும், பிணியும் வருமா? நிச்சயமாக வாய்ப்பே இல்லை. துன்பம் தீர்க்கும் கோளறு பதிகத்தையும், பிணி தீர்க்கும் திருநீறு பதிகத்தையும் உள்ளிட்ட திருமுறைகளை பாடும் நம் அடியவர்களால், அவர்களுக்கு மட்டுமின்றி அனைவருக்குமே நன்மைதான் என்றும்.
செவியமுதை சுவைத்த அனைவரும் உணவமுதை சுவைக்கும் காட்சி. அளவோடிருந்தால் சகல உணவுப் பொருள்களும் அமுது தானே!

திருமுறை முற்றோதலில் ஈடுபட்டிருக்கும் இந்த நல்ல உள்ளங்களின் முயற்சியை பாராட்டி, ஈசன் அருளால் இது தொடர்ந்து உலகம் உள்ளவரை தொடரவேண்டும் என்று இறைவனை வேண்டி வணங்குவோம்.

சிவாய நம
திருச்சிற்றம்பலம்

இனிமையான இறைவன் - வெண்ணிக் கரும்பர் எனும் கரும்பீசுவரர்

2009-01-28T21:43:00.000+05:30

தஞ்சையிலிருந்து சுமார் 28 கி.மீ. தூரத்தில் உள்ளது கோவில்வெண்ணி என்றழைக்கப் படும் திருவெண்ணியூர். இந்த ஊரின் பேருந்து நிலையத்தில் இருந்து சுமார் ஒரு கி.மீ இடது பக்கமாக செல்லும் சாலையில் சென்றால் அய்யனார் கோவில் ஒன்று இருக்கும் அதனை கடந்து சிறிது தூரத்தில் தாமரைத் தடாகத்தின் அருகே அமைந்துள்ளது அழகிய நாயகி உடனுறை வெண்ணிக் கரும்பர் ஆலயம். இது தற்போது சௌந்தராம்பிகை உடனுறை கரும்பீசுவரர் ஆலயம் என்றழைக்கப்படுகிறது.

வெண்ணித் தொல்நகர் மேயவெண் திங்களார்
கண்ணித் தொத்த சடையர் கபாலியார்
எண்ணித் தம்மை நினைந்திருந் தேனுக்கு
அண்ணித் திட்டமு தூறுமென் நாவுக்கே

என்று நாவுக்கரசரும்

சடையானைச் சந்திர னோடுசெங் கண்ணரா
உடையானை யுடைதலை யிற்பலி கொண்டூரும்
விடையானை விண்ணவர் தாந்தொழும் வெண்ணியை
உடையானை யல்லதுள் காதென துள்ளமே.

என்று இறைவனின் செல்லப் பிள்ளை சம்பந்தரும் பாடி காதலாகி கண்ணீர் மல்கி தொழுது வணங்கிய கரும்பீசரை நாம் காண கண்கோடி வேண்டுமே!

உருவாகிக் கொண்டிருக்கும் கோபுரம்

அப்பனை நந்தியை ஆரா அமுதினை
ஒப்பிலி வள்ளலை ஊழி முதல்வனை
எப்பரி சாயினும் ஏத்துமின் ஏத்தினால்
அப்பரி சீசன் அருள்பெற லாமே.
நந்தியை வணங்கி இறைவனை காணச் செல்வோம்

இதோ கண்ணுக் கினிய கரும்பீசர்
கரும்புக் கழிகளை ஒன்று சேர்த்தார் போல் தெரிகிறதா இறைவன் திருமேனி
ஐயன் அருள் மட்டும் போதாது, இதோ அன்னையின் தரிசனம்இது கோபுரத்தை ஒட்டியுள்ள சுற்றுச் சுவர்

மேலுள்ள சுவருக்கு எதிர் புறம் உள்ள விநாயகர்
தெற்குப் புறத் தோற்றம்
தெற்குச் சுற்றில் அமைந்திருக்கும் விநாயகர்குருபகவான்

அண்ணாமலையார்
அண்ணாமலையாருக்கு எதிரே இடிந்த நிலையில்...
வடக்குப் புறத் தோற்றம்
இந்த விசித்திர யாளி என்னவென்று தெரிகிறதா, அபிடேக நீர் வெளியேறும் வாய்க்கால்

பைரவர்

தாமரைத் தடாகம்

தடாகத்தில் மலர்ந்திருக்கும் ஒரு தாமரை

இக்கோயிலில் பல கல்வெட்டுக்கள் படியெடுக்கப் பட்டுள்ளன. இராஜராஜன் கல்வெட்டுக்கள் ஆறு. குலோத்துங்கன் ஒன்பது. தேதியில்லா கல்வெட்டு ஒன்றும் உள்ளன. 13-10-1222 தேதியிட்ட இராஜராஜன் கல்வெட்டு நீளமானதாகும். அதன்படி, நாடு சுத்தமலிவளநாடு, உள்நாடு வெண்ணி கூற்றம், ஊர் வெண்ணிநகரம்,இறைவன் திருவெண்ணி உடையார் என அறிகிறோம். அந்த இறைவனுக்கு நித்த வினோத வளநாட்டு வீரசோழ வளநாட்டுப் புத்தூரான திருபுவனச் சதுர்வேதி மங்கலத்துச் சபையார் திருநாமத்துக் காணியாக விட்ட நிலத்தின் எல்லை கூறப்படுகிறது. அந்நிலத்தில் விளைகிற பொருள்களின் அளக்கும் அளவும் கொடுக்கப்பட்டுள்ளது. இனி குலோத்துங்கன் கல்வெட்டுக்கள் ``புனல்வாய்த்து`` என்ற தொடக்கம் கொண்டவைகள். கோயிலுக்கு நிலங்கொடுக்கப் பட்ட விவரங்கள் அவைகளில் காணப்படுகின்றன. சுற்று வட்டத்து ஊர்களின் பெயர்களும் ஆட்களின் பெயர்களும் அவைகளில் எழுதப்பட்டுள்ளன. அவைகளில் ஒன்று 2-7-1196 ஆம் தேதியுடையது. ஆகவே கி.பி. 12 ஆவது நூற்றாண்டின் முற்பகுதியும் இக்கோயில் சிறந்திருந்த காலமாகும்.

தெற்குப் புறமுள்ள கல்வெட்டு

கீழுள்ளவை மேற்குப் புறமுள்ள கல்வெட்டுகள்

உள்ளமும் உயிரும் குளிர்ந்திடுமே
உலகையாளும் ஈசன் அருளால்

கரும்பீசுவரரின் அருள் தங்களுக்கும் கிட்டட்டும்...

பொங்கலோ பொங்கல்....

2009-01-12T20:14:00.000+05:30

தைத் திங்கள் பிறந்தாச்சு
தமிழ் புத்தாண்டும் மலர்ந்தாச்சு
அகப் புறத் தூய்மையோடு
அன்பு கொண்ட சுற்றத்தோடு
மஞ்சள் கரும்பு கிழங்கோடு
புத்தரிசி வெல்லமோடு
புதுப்பானையில் பொங்கலிட்டு
பொங்கலோ பொங்கல் எனக்கூவி
வணங்கிடுவோம் ஆதவனை
வாழ்த்திடுவோம் இயற்கைதனை
அன்பு நிறைந்த ஆனிரைகளை
ஆதரித்து மகிழ்ந்திடுவோம்
அதன் அன்புதனை போற்றிடுவோம்

தமிழ் புத்தாண்டு மலரும் நாளில்
தமிழ்த் தாயை போற்றிப் பாடி
திக்கெட்டும் தமிழ் பரவ
திரண்டிடுவோம் பாடு பட
....

மாட்டு பொங்கல் என்று தலைப்பிடப்பட்ட திருவையாறு ஐயாறப்பர் ஆலய ஓவியம் ஒன்று உங்கள் பார்வைக்காக. இதில் பொங்கல் வைக்கும் நிகழ்ச்சி இருக்கிறதோ இல்லையோ, திருநெய்த்தானம் ஆலயத்தில் மக்களுக்கும் மன்னருக்கும் முன்னே பசுக்களும் கன்றுகளும் பசுபதியை வணங்கும் காட்சி. அதன் கண்களில் உள்ள மகிழ்ச்சியை பார்க்கத் தவறாதீர்!

அனைவருக்கும் எனது உளம் கனிந்த தமிழ் புத்தாண்டு மற்றும் பொங்கல் நல்வாழ்த்துகள்

தாராசுரம் ஐராவதேசுவரர் ஆலயம் (Tharasuram Iravateshvarar Temple)

2008-12-08T21:00:00.000+05:30

பழையாறை, நந்திபுரம், இராசராசபுரம் என்றழைக்கப்பட்ட தாராசுரம், தஞ்சையிலிருந்து கும்பகோணம் செல்லும் வழியில் 37 கி.மீ (கும்பகோணத்திலிருந்து 3 கி.மீ) தொலைவில் உள்ள அழகிய ஊர். சுந்தரசோழர் காலத்தில் சோழர்களின் தலைநகராக இருந்த பழையாறையை சில தலைமுறைகளுக்குப் பிறகு புதுப்பித்து விரிவாக்கம் செய்தார் இரண்டாம் இராசராசன் (1147-1173). இவரது பெயராலேயே இராசராசபுரம் என்றழைக்கப்பட்ட ஊர் இன்று தாராசுரம் என்ற பெயரால் அழைக்கப்படுகிறது.

இங்கு பசுமையான, அமைதியான சூழலில் அமைந்திருக்கும் ஆலயம் ஐராவதேசுவரர் ஆலயம். அற்புதமான சிற்பங்களுடைய இந்த ஆலயம் மேற்குறிப்பிட்ட இரண்டாம் இராசராசனாலேயே எழுப்பப்பட்டது. 2004 - ஆம் ஆண்டு யுனெஸ்கோவால் உலகப் பாரம்பரிய சின்னமாய் அறிவிக்கப்பட்ட இந்த ஆலயம் பிற்காலச் சோழர் சிற்பக் கலைக்கு ஒரு சிறந்த எடுத்துக்காட்டு. இதோ ஆலயம் தங்கள் கண் முன்னே...

ஆஹா! என்னவொரு பசுமையான சுற்றுப்புறச் சூழல்

முதன்மைக் கோபுரம்

இசையின் ஏழு ஒலிகளை எழுப்பும் படிகள், ஒரு நாணயத்தை முதல் படியிலிருந்து விழச் செய்தால் அது ஒவ்வொரு படியில் விழும்போதும் ஒருவித ஒலியை எழுப்பும். இதை சோதித்து சோதித்து சுரண்டிவிட்டனர் கலை ஆர்வம் மிக்க நம்மவர்கள், இதனாலேயே சிறை வைக்கப் பட்டுவிட்டது இன்று.

இதே போன்ற யாளி வரிசைகளை தஞ்சை மற்றும் திருவையாறு ஆலயங்களிலும் காணலாம்.

ஒவ்வொரு படியிலும் உள்ள சிறிய சிற்பங்களை கவனிக்கவும்

கோவிலின் உட்புறத் தோற்றம், இரத மண்டபம் மற்றும் விமானம்

அழகான யானையும், குதிரையும் இழுத்துச் செல்லும் இரத மண்டபம்

2008 ஆம் ஆண்டு குருப்பெயர்ச்சி சிறப்பு பூசைக்காக திறண்டிருக்கும் மக்கள் கூட்டம்

குருபகவானுக்கு திருநீர் அபிஷேகம்

குருபகவானுக்கு தீபாராதனை - எங்கெங்கும் ஓம் நமசிவாய ஒலிக்க

குரு தரிசனம் கிடைத்தாயிற்று பிறகென்ன...

அட இதென்ன கூட்டம்! கீழே போய் பாருங்க...

ஆஹா! அற்புதமான குரு தரிசனம் அதற்குப் பிறகு சுவைமிகுந்த சக்கரைப் பொங்கல், எலுமிச்சை சாதம், தயிர் சாதம் மற்றும் சுண்டல். சும்மா சொல்லக் கூடாதுங்க பிரசாதம் ரொம்பப் பிரமாதம், இது மாதிரி பிரசாதத்த எங்கயும் சாப்பிட்டதில்லீங்க...

பிரசாதம் சாப்பிட்டு வயிறு நிறைஞ்சிடுச்சா, இந்த மாதிரி உடம்ப வளைச்சி ஒரு ஆட்டம் போடுங்க எல்லாம் சீரணமாயிடும்

கீழே உள்ள படங்களைப் பாருங்கள், ஆலயத்தின் உள்ளே திருப்பணி நடக்கிறது. நல்ல விஷயம்தான் ஆனால் கற்களையும், குப்பைகளையும், சிமெண்ட் பைகளையும் சிற்பங்களின் மேலே போடுவது நியாயமா? 900 ஆண்டுகள் கடந்தும் நம் கண்களுக்கு விருந்தளிக்கும், நம் முன்னோர்களின் சிறப்பை பறை சாற்றும் பொக்கிஷங்களை காப்பதை விட்டுவிட்டு அதை அழிக்கலாமா? ஏற்கனவே காற்றாலும், மழையாலும் சிதைந்து கொண்டிருக்கும் சிற்பங்களை மென்மேலும் நாம் சிதைக்கலாமா?

இன்று தொழில்நுட்பம் வளர்ந்த காலத்திலும் நம்மால் கான்கிரீட்டில் கூட சரியாக செய்ய முடியாத சாளரங்களை கல்லினால் எவ்வளவு அழகாக செதுக்கியுள்ளார்கள்!

இது தல விருட்சம், வில்வ மரம். அதன் பின்னே உள்ள சிற்பத்தை கீழே உள்ள படத்தில் பாருங்கள்

ஒரே தலை ஆனால் இரண்டு உருவம், காளை மற்றும் யானை. நேர்த்தியாக வடிவமைக்கப்பட்ட சிற்பம், சிற்பியின் கலைத் திறனை என்னவென்று போற்றுவது!

இது அருகில் உள்ள அம்மனின் ஆலயம்

மேல் உள்ள படங்களில் உள்ளது போலவே ஐராவதேசுவரர் ஆலயத்திலும் நீர் இருந்து அதை குருபெயர்ச்சி விழாவின் பொருட்டு வெளியேற்றியதாக அவ்வூரைச் சார்ந்தவர் தெரிவித்தனர். தரைமட்டத்திலிருந்து சுமார் ஐந்தடி உயரம் தாழ்வாக கட்டப்பட்டிருக்கும் ஆலயமான இங்கு நிச்சயம் அந்த நீர் வடிவதற்கான வழிமுறைகள் செய்யப்பட்டிருக்க வேண்டும். காரணம் இன்றிருந்ததை விட பலநூறாண்டுகளுக்கு முன் பெய்த மழையின் அளவு அதிகம், மேலும் ஒவ்வொரு சிற்பத்தையும் பார்த்து பார்த்து செதுக்கியவர் நிச்சயம் அதை காப்பதற்கான வழியையும் செய்திருப்பர். அதை கண்டறிந்து சீர் செய்ய வேண்டும், நம் முன்னேர்கள் விட்டுச் சென்ற வரலாற்று ஆவணங்களை பாதுகாக்க வேண்டும்.

இங்குள்ள சிற்பங்களையும், அதன் பின்னனி கதையையும் அறிய ஆர்வமிருந்தால் இங்கே சுட்டவும்
http://www.poetryinstone.in/lang/ta/tag/darasuram

செங்குந்தர் எனும் கைக்கோளர் - ஒரு பார்வை

2008-11-30T12:26:00.000+05:30

சுமார் 2000 ஆண்டுகளுக்கு முன்னிருந்தே தமிழகத்தில் உள்ள ஒரு இனம் செங்குந்தர் என்றழைக்கப்படும் கைக்கோளர். கைக்கோளர் எனும் பெயர் செங்குந்தர் என்ற பெயரோடு சேர்ந்து வழக்கத்தில் வர ஆரம்பித்தது சுமார் 1200 ஆண்டுகளாக. இவர்கள் தமிழகத்தின் பல பகுதிகளில் குறிப்பாக சேலம், ஆத்தூர், தர்மபுரி, ஈரோடு, கோயம்புத்தூர், ஆற்காடு, காஞ்சிபுரம், ஜெயங்கொண்டம், திருமழபாடி, தஞ்சை, சென்னை, மதுரை, சென்னை ஆகிய இடங்களில் மிகுதியாக வாழ்ந்து வருகின்றனர். இவர்களின் தொழில் நெசவாக இருந்தாலும், ஏராளமானோர் வணிகர்களாகவும் மற்ற தொழில்களிலும் ஆண்டாண்டு காலமாக ஆதிக்கம் செலுத்தி வருகின்றனர்.

"கூவிளம் இதழி தும்பை
கொண்டார்ச்சனை செய்தபேர்க்கு
தேவநாடாளவைக்கும் திருகுகைவேல்
செங்குந்தம் துணை" (செங்குந்தர் சதகம்)
செங்குந்தம் என்றால் இரத்தத்தால் சிவந்த ஈட்டி, செங்குந்தர் என்றால் செந்நிறமான ஈட்டியை உடையவர். போர்களின் பொழுதும், மன்னரின் பாதுகாப்பின் சமயமும் கைகளில் ஈட்டி பொருந்திய கோலை வைத்து சுழற்றுபவர் என்பதால் கைக்கோளர் என்றும் அழைக்கப்பட்டனர்.

குறிஞ்சி நிலப்பகுதியிலிருந்த வந்த இனத்தவர், முருகனை தன் குலதெய்வமாக வழிபடும் இவர்கள் முருகனின் அம்சமான வீரபாகுத் தேவரின் வழிவந்தவர்கள். இதனாலோ என்னவோ வரலாற்றில் மிகவும் புகழ்பெற்ற படைவீரர்களாக திகழ்ந்தனர். மூவேந்தர்களிடமும் மிகவும் நம்பிக்கைக்குரிய அந்தரங்க படைவீரர்களாய் இருந்த இவர்கள் வரலாற்றில் முக்கிய இடம் பிடித்தனர். ”வாள் தாங்கிய கைக்கோளர்” என்று கல்வெட்டுகளில் உள்ள செய்தியால் இவர்கள் ஈட்டி மட்டும் அல்ல வாள் பிடித்தும் போரிட வல்லர் என்று அறிகிறோம்.

செங்குந்தர்கள் முருகனின் தாயான பார்வதியின் சிலம்பில் இருந்த 9 இரத்தினங்களில் இருந்து பிறந்தவர்கள் என்பதால், திருச்செந்தூர் சூரசம்ஹாரத்தின் பொழுது 9 செங்குந்தர்கள் வீரர்கள் உடையணிந்து வீரபாகுத் தளபதிகளாய் குமரன் சூரனை சம்ஹரிக்க உதவுவது இன்றும் நடைமுறையில் உண்டு. திருசெந்தூர் முருகன் கோயிலில் நடைபெறும் மாசித்திருவிழாவில் பன்னிரண்டாம் நாள் திருவிழா செங்குந்தர் குலத்தவரின் மண்டகப்படியாக இன்றும் நடைபெறுகிறது.

தெரிஞ்ச கைக்கோளப்படை என்பது சோழர்களின் படைப்பிரிவில் ஒன்று என்று கல்வெட்டாய்வுகள் தெரிவிக்கின்றன. பொன்னியின் செல்வனில் கல்கி கைக்கோளப்படை பற்றி எழுதியிருப்பதை சற்று பாருங்கள்,

"மூன்று கம்பீர புருசர்கள் பிரவேசித்தார்கள். அவர்களுடைய முகங்களிலும் தோற்றத்திலும் வீர லக்ஷ்மி வாசம் செய்தாள். அஞ்சா நெஞ்சம் படைத்த ஆண்மையாளர் என்று பார்த்தவுடனே தெரிந்தது. (இன்று தமிழ் நாட்டில் கைத்தறி நெசவுத் தொழிலில் ஈடுபட்டு நூலின்றித் திண்டாடும் கைக்கோள வகுப்பார் சோழப் பேரரசின் காலத்தில் புகழ்பெற்ற வீர வகுப்பாராயிருந்தனர்). அவர்களில் பொறுக்கி எடுத்த வீரர்களைக் கொண்டு சோழ சக்கரவர்த்திகள் 'அகப் பரிவாரப் படை'யை அமைத்துக் கொள்வது வழக்கம். அப்படிப் பொறுக்கி எடுக்கப்பட்ட படைக்குத் 'தெரிஞ்ச கைக்கோளர் படை' என்ற பெயர் வழங்கியது. அந்தந்தச் சக்கரவர்த்தி அல்லது அரசரின் பெயரையும் படைப்பெயருக்கு முன்னால் சேர்த்துக் கொள்வதுண்டு.

"சுந்தர சோழ தெரிஞ்ச கைக்கோளப் படையார் தானே?" என்று அநிருத்தர் கேட்டார்.

"ஆம், ஐயா! ஆனால் அப்படிச் சொல்லிக் கொள்ளவும் எங்களுக்கு வெட்கமாயிருக்கிறது."

"அது ஏன்?"

"சக்கரவர்த்தியின் சோற்றைத் தின்றுகொண்டு ஆறு மாத காலமாக இங்கே வீணில் காலங்கழித்துக் கொண்டிருக்கிறோம்."

"உங்கள் படையில் எத்தனை கை? எத்தனை வீரர்கள்?"

"எங்கள் சேனை மூன்று கைமா சேனை, இவர் இடங்கை சேனைத் தலைவர்; இவர் வலங்கை சேனைத் தலைவர்; நான் நடுவிற்கைப் படைத்தலைவன்.ஒவ்வொரு கையிலும் இரண்டாயிரம்வீரர்கள். எல்லோரும் சாப்பிட்டுத் தூங்கி கொண்டிருக்கிறோம். போர்த் தொழிலே எங்களுக்கு மறந்து விடும் போலிருக்கிறது."

"உங்களுடைய கோரிக்கை என்ன?"

"எங்களை இலங்கைக்கு அனுப்பி வைக்கக் கோருகிறோம். இளவரசர் அருள்மொழிவர்மர் மாதண்ட நாயகராயிருக்கும் சைன்யத்திலே சேர்ந்து யுத்தம் செய்ய விரும்புகிறோம்!"
"ஆகட்டும்; தஞ்சைக்குப் போனதும் சக்கரவர்த்தியின் சம்மதம் கேட்டுவிட்டு உங்களுக்கு அறிவிக்கிறேன்."

"பிரம்மராஜரே! அதற்குள்ளே இலங்கை யுத்தம் முடிந்து விட்டால்...?"

"அந்தப் பயம் உங்களுக்கு வேண்டாம், இலங்கை யுத்தம் இப்போதைக்கு முடியும் என்பதாகத் தோன்றவில்லை."

"ஈழத்துச் சேனாவீரர்கள் அவ்வளவு பொல்லாதவர்களா? எங்களை அங்கே அனுப்பி வையுங்கள். ஒரு கை பார்க்கிறோம்!..."

"ஒரு கை என்ன? நீங்கள் மூன்று கையும் பார்ப்பீர்கள், தெரிஞ்ச கைக்கோளரின் மூன்று கை மாசேனை யுத்தக்களத்தில் புகுந்துவிட்டால் பகைவர்களின் பாடு என்னவென்று சொல்ல வேண்டுமோ? நடுவிற்கை வீரர்கள் பகைவர் படையின் நடுவில் புகுந்து தாக்குவீர்கள். அதே சமயத்தில் இடங்கை வீரர்கள் இடப்புறத்திலும் வலங்கை வீரர்கள் வலப்புறத்திலும் சென்று இடி விழுவதுபோலப் பகைவர்கள்மீது விழுந்து தாக்குவீர்கள்..."

"அப்படித் தாக்கித்தான் பாண்டிய சைன்யத்தை நிர்மூலம் செய்தோம்; சேரர்களை முறியடித்தோம்."

அப்பப்பா! என்னவொரு அசாத்திய வீரம், சுந்தர சோழரின் மந்திரியான அநிருத்த பிரம்மராயர் சாதாரண ஆளில்லை, திருச்சிக்கு அருகில் உள்ள அன்பில் எனும் ஊரைச் சேர்ந்த இவர் சோழர்களின் சாணக்கியர், இவரின் செவியும், கண்ணும் சோழ நாடு முழுவதும், இவருக்கு தெரியாமல் சோழ நாட்டில் எதுவுமே நடக்காது அந்நாளில். இப்பேர்பட்ட ஒருவரே கைக்கோளப் படையை புகழ்கிறார் என்றால் அவர்களின் வீரம் எந்த அளவிற்கு சிறந்ததாயிருந்திருக்க வேண்டும்.

செங்குந்தர்களை பற்றி பல்வேறு புலவர்கள் பல காலகட்டங்களில் பாடியதை தொகுத்து செங்குந்த பிரபந்த திரட்டு என்று நூலாக பதிக்கப்பெற்றுள்ளது. இடைக்காலச் சோழர்களுக்கு முன்னரே கைக்கோளர்களை பற்றிய செய்திகள் பல சமணர் கல்வெட்டுகளிலும் கண்டறியப்பட்டுள்ளன.

சோழர் காலத்திற்கு பிறகு (13ஆம் நூற்றாண்டு) படிப் படியாக நெசவுத்தொழிலுக்குள் நுழைந்த இவர்கள் 17ஆம் நூற்றாண்டுக்குப் பின்னர் தங்கள் குலத்தொழிலாகிய படைத் தொழிலை விட்டு முழுமையாக நெசவுத் தொழிலுக்கு மாறினர். நெசவுத் தொழிலோடு, நிலக் கிழார்களாகவும், விவாசாயிகளாகவும், வணிகர்களாகவும் கூட உருவெடுத்தனர்.

18ஆம் நூற்றாண்டு முதலே இவர்கள் முதலி எனும் பெயரை தங்கள் பெயருக்கு பின் சேர்த்துக்கொண்டனர் என்பது அந்நாள் பாண்டிச்சேரியின் கவர்னருக்கு முதன்மை துபாஷியாய் இருந்த ஆனந்த ரங்கப் பிள்ளை அவர்களின் டைரி குறிப்பிலிருந்து தெரியவருகிறது.

திருப்பதி, திருவரங்கம் போன்ற ஆலயங்களை நிர்வகிக்கும் பொறுப்பிலும் திருவண்ணாமலையில் பல்வேறு சடங்குகளை நடத்தவும் உரிமைபெற்றிருந்தனர் என்றும், மேலும் பல ஆலயங்களுக்கு நிலம், நடை உள்ளிட்ட பல்வேறு நிவந்தங்களை அளித்திருக்கின்றனர் என்றும் India before Europe by Catherine Ella Blanshard Asher, The Political Economy of Commerce: Southern India, 1500-1650, BySanjay Subrahmanyam, Textiles in Indian Ocean Societies, By Ruth Barnes ஆகிய நூல்கள் தெரிவிக்கின்றன.

விக்கிரமச் சோழன், இரண்டாம் குலோத்துங்கச் சோழன் முதலிய மூன்று சோழர்களிடம் அரசவைப் புலவராக இருந்த ஒட்டக் கூத்தர் செங்குந்த இனத்தைச் சேர்ந்தவர்.

இரட்டைப் புலவர்கள் என்று பெயர் பெற்ற மதுசூரியர் மற்றும் இளஞ்சூரியர் இவர்களும் செங்குந்த மரபில் தோன்றியவர்கள். இவர்கள் பிறந்தது சோழநாட்டின் ஆமிலந்துறையில், இவர்களில் ஒருவர் குருடர் மற்றவர் முடவர், இருப்பினும் முடவர் வழி காட்ட குருடர் அவரைத்தோள் ஏற்றிகொண்டு இருவருமாய் பல சிவாலயங்களுக்குச் சென்று பாடல்கள் பாடியுள்ளனர். இவர்களில் ஒருவர் முதல் இரண்டு அடியை பாட மற்றவர் அடுத்த இரண்டடியை பாடி முடிப்பார். காளமேகப் புலவரின் நண்பர்களாய் இருந்த இவர்கள் அவருடைய மறைவின் போது, புலவரின் உடலை நெருப்பு தன்னுள் வேகவைக்கத் தொடங்குவதை கண்ணுற்ற முடவர், முகத்தில் சோகம் தாளாது அறைந்து கொண்டார்.

'ஆசுகவியால் அகில உலகெங்கும்
வீசுபுகழ்க் காளமேகமே'
என முடவர் கதற, குருடர் உடனே,
'-பூசுரா விண்கொண்ட செந்தனவாய் வேகுதே ஐயையோ
மண்தின்ற பாணமென்றவாய்!'
எனப்பாடி அழுதார்.

அரசியலில் - அண்ணாதுரை, ஆன்மிகத்தில் - திருமுருக கிருபானந்த வாரியார், கவிதையில் ஒட்டக்கூத்தர், பாவேந்தர் பாரதிதாசன், விடுதலைப் போராட்டத்தில் - தில்லையாடி வள்ளியம்மை, திருப்பூர் குமரன் என அறிஞர்களும், கவிஞர்களும், தியாக செம்மல்களும் என கைக்கோளர் குலத்தில் உதித்தவர்களின் பட்டியல் நீண்டுகொண்டே செல்கிறது.

72 உட்பிரிவுகளை கொண்ட கைக்கோளர்கள் தமிழகத்தில் மட்டுமின்றி, கேரளா, ஆந்திரா மற்றும் கர்நாடகாவிலும், இலங்கையிலும் முடியாட்சி காலம் தொட்டு வாழ்ந்து வருகின்றனர். கொங்கு நாட்டு சிற்றரசர்களில் ஒரு பிரிவினரான கெட்டி முதலியார் கட்டிய தாரமங்கலம் கோவில் சிற்பக் கலைக்கு பிரசித்தி பெற்றது. இந்த ஆலயத்தை பற்றியும் கெட்டி முதலியார்களை பற்றியும் தனியொரு பதிவில் பார்ப்போம்.

(பி.கு : இந்த கட்டுரைக்கான குறிப்புகள் தஞ்சை நூலகத்தில் இருந்தும், இணையத்தில் (குறிப்பாக மரத்தடி, முத்தமிழ் மன்றம், தினமலர்) இருந்தும் எடுக்கப்பட்டது. இரட்டையர் பாடல் ஷைலஜா அவர்களின் கட்டுரையில் இருந்து எடுப்பட்டது என்பதை நன்றியுடன் தெரிவித்துக்கொள்கிறேன்)

திருவையாறு தலவரலாறு

2008-11-15T00:24:00.000+05:30

இந்த திருக்கோவிலின் தல வரலாறு கீழ்கண்டபடி கோவிலில் எழுதப்பட்டிருக்கிறது.

இத்திருக்கோயிலை முதன் முதலில் பிரிய விரதன் எனும் சூரிய வம்சச் சக்ரவர்த்தி திருப்பணி செய்தான் என்பது புராண வரலாறு.

கி.மு. முதலாம் நூற்றாண்டில் வாழ்ந்த சோழப் பேரரசன் கரிகாற் பெருவளத்தான். இவன் காடு கெடுத்து நாடாக்கி வளம் பெருக்கியவன் கல்லணை கட்டி, காவிரிக்குக் கரை எழுப்பி இமயத்தே புலி பொறித்து வெற்றியுடன் வரும் வழியில் ஐயாற்றை அடைந்ததும் அவன் ஏறி வந்த தேர் பூமியில் அழுந்தி இடம் பெயரவில்லை. இதனடியில் ஏதோ ஓர் சக்தி ஈர்க்கிறது என உணர்ந்து காட்டை அழித்து பூமியை அகழ்ந்தான், அடியில் சிவலிங்கம், சக்தி, விநாயகர், முருகன், சத்த மாதர்கள் சண்டர், சூரியன் திருவுருவங்களும், யோகி ஒருவரின் சடைகள் பரந்து, விரிந்து, புதைந்து வேரூன்றி காணப்பட்டன. மேலும் அகழவே நியமேசர் எனும் அகப்பேய்ச் சித்தர் நிட்டையிலிருப்பது கண்டு மெய்விதிர்ப்பெய்தி அவர் பாதம் பணிந்தான் அவரும் கருணை கூர்ந்து கரிகாலனிடம் ”தேவர்களும், நந்தீசரும் வழிபட்ட இம்மகாலிங்கத்திற்கும், மற்றைய படிமங்கட்கும் கோயில் எடுப்பாயாக” எனக்கூறி எவராலும் வெல்லற்கரிய தண்டமொன்று மளித்து, கோயில் கட்டுதற்கு வேண்டிய பொருளும் நந்தியின் குளம்படியில் கிடைக்குமென அருள் புரிந்தார். அவ்வாறே கரிகாற் சோழன் சிறப்பாக ஆலயத் திருப்பணி செய்து, குடமுழுக்கும் செய்து நிவந்தங்கள் அளித்தான். கரிகாற் சோழனுக்கு ஐயாரப்பரே எல்லாம் வல்ல சித்தர் வடிவில் தான்தோன்றி நாதராக சுயம்பு வடிவில் உள்ள தன் இருப்பிடம் காட்டி கோயிலும் கட்டச்செய்தார் என்பதறிந்தோம். இதற்குச் சான்று, கற்பக்கிரக பிரகாரத்தில் விரிசடை படர்ந்திருப்பதால் சென்று மிதிக்கக் கூடாதென்பதும், சோழனால் கட்டிய செம்பிய மண்டபமே செப்பேச மண்டபமாயிருப்பதும், கரிகாற்சோழன், அவன் மனைவி இருவரின் சிலைகள் இருப்பது கண்டு உண்மை உணரலாம்.

கி.பி. 825-850 தெள்ளாறெறிந்த நந்திவர்ம பல்லவன் காலத்திற்கு முந்திய திருப்பணி, ஆதி கோயில் அமைப்பை மாற்றியுள்ளது. அருள் மிகு ஐயாரப்பர் எழுந்தருளியுள்ள கருவரைக் கற்றளி துவார பாலகர், யாளித்தூண்கள் பல்லவர்காலப் பணியாகும்.

கி.பி. 982[1]-இல் வேங்கி நாட்டு விமலாதித்த தேவர் இதனைப் புதுக்கி, மகாதேவர்க்கு நிறைய அணிகலண்கள் வழங்கியுள்ளார்.

கி.பி. 1006 – ல் முதலாம் இராசராசன் (985 – 1014) மனைவி ஒலோக மாதேவியார் வட கைலாயம் எனும் ஒலோக மாதேவீச் சுரத்தைஎழுப்பி எழுந்தருளும் திருமேனிகள், ஒலோக வீதி விடங்கர் எனும் சோமஸ்கந்தர், விநாயகர் முதலான பஞ்சமூர்த்திகளை வழங்கியுள்ளார்.

கி.பி. 1014 – 1042 முதலாம் இராசேந்திர சோழ தேவர் மனைவி பஞ்சவன் மாதேவியார் தென் கைலாயம் கோயில் பழுதுபட்டு இருந்ததை புதுப்பித்தார்.

அடுத்து, கிருஷ்ண ராஜ உடையாரால் இக்கோயிலின் திருச்சுற்று மாளிகை எடுக்கப்பெற்றுள்ளது. சலவைத் தூண்கள் சாளுக்கிய நாட்டு வாகாடகச் சிற்பத் திறனை எடுத்துக்காட்டவே பகைவர் நாட்டிலிருந்து கொணர்ந்தவையாகவுள்ளன.

கி.பி. 1118 – 1135 விக்ரம சோழன் காலத்தில் மூன்று, நான்காம் திருச்சுற்றுகளும், மதில், கீழக்கோபுரங்களும் எடுக்கப்பட்டிருப்பதுடன் வடகிழக்கில் நூற்றுக்கால் மண்டபம் அடிப்படை பீடத்துடன் எழும்பி நின்று விட்டது.

கி.பி. 1381 - ல் சடையவர்மன் சுந்தரபாண்டியன் ஆட்சியில் வீர சரவண உடையார் காலத்து செந்தலை கருப்பூர், கச்சி வீரப்பெருமான் மகளால் கோயில் மண்டப மதில் சீர்திருத்தம் பெற்றது.

கி.பி. 1530 – ல் அச்சுதப்ப நாயக்கர் நின்று போன (தண்டபாணி கோயில்) மண்டபத்தை 144 தூண்களுடைய அழகிய மண்டபமாக உருவாக்கி முடித்தார். அவர்காலத்து இடைமருதூர் ஆனையப்பப் பிள்ளையாலும், அவர் தம்பி வைத்திய நாதராலும் மேலக்கோபுரம், முதற் பிரகாரம், அதில் திருநடமாளிகைப் பத்தி (மாடி) மூன்றாம் பிரகாரத் தெற்குக் கோபுரம், திருக்குளம், காவிரி பூசைப் படித்துறை “கல்யாண சிந்து” மண்டபம், குதிரை பூட்டிய தேர் மண்டபங்கள் ஆகிய இவை யாவும் அவர்களால் எடுக்கப் பட்டனவே.

கி.பி. 1784 காஞ்சீபுரம் வள்ளல் பச்சையப்ப முதலியார், மூன்றாம் பிரகார முகப்பு மண்டபத் திருப்பணி செய்துள்ளார். அவரும் அவரது இரு மனைவியர் திருவுருவங்களும் தூண்களில் உள்ளன. மூன்றாம் பிரகார கிழக்குக் கோபுரம் விக்கிரம சோழனால் கட்டப் பெற்றதாகும்.

கி.பி. 1937 – ல் நாமறிந்த வகையில் அம்மன் கோயில் முழுமையும் அழகு ஒழுகும் பளிங்குக் கருங்கள் திருப்பணியாக தேவக்கோட்டை சிவத்திரு உ.ராம.மெ.சுப.சேவு. மெய்யப்பச் செட்டியார் அவர்கள் குடும்பத்தினரால் திருப்பணி செய்யப் பெற்று 2-5-1937 ல் குடமுழுக்கு இனிதே நிறைவேறியுள்ளது.

கி.பி. 1971 – ல் திருக்கையிலாய பரம்பரை தருமபுரம் ஆதீனம் 25 ஆவது குருமகா சந்நிதானம் ஸ்ரீலஸ்ரீ சுப்பிரமணிய தேசிக ஞான சம்பந்த பரமாச்சாரிய சுவாமிகள் அவர்களால் திருக்கோயில் முழுமையும் செப்பமுற திருப்பணி செய்யப்பெற்று 31-3-1971 ல் திருக்குடமுழுக்குப் பெருவிழா மிகச் சீறும் சிறப்புமாக நிகழ்ந்தேறியது.

[1] 1013 – 14 ஆம் ஆண்டு என கல்வெட்டு ஆய்வுகள் தெரிவிக்கின்றன. இந்த விமலாதித்த தேவர்தான் இராஜராஜ சோழனின் புதல்வி குந்தவி தேவியை மணம்செய்திருக்கக் கூடும் என்பதும் கருத்து.

பொன்னியின் செல்வருக்கு சதய விழா

2008-11-11T07:35:00.000+05:30

நம் பொன்னியின் செல்வரான இராஜராஜ சோழருக்கு 1023 வது சதய விழா வெகு சிறப்பாக நடந்து முடிந்திருக்கிறது.
அலையென திரண்டுவந்த மக்கள் வெள்ளம், திருமுறை உலா, சோழர் வரலாறு பற்றிய சொற்பொழிவு, பெருவுடையாருக்கு 47 வகை அபிஷேகம் என விழா சிறப்பாக நடந்தேறியது. ஒளி வெள்ளத்தில் மிதந்த பெரிய கோவில் இராஜராஜனின் பெருமையை பறைசாற்றியது. மக்கள் மிக ஆர்வமுடன் பெருவுடையாரை வழிபட்டு, சோழர் வரலாற்றையும், திருமுறைகளையும் கேட்டுக் கொண்டிருந்தது நம் பொன்னியின் செல்வர் மீது அவர்கள் வைத்திருந்த அன்பை காட்டியது.

சதயம் இராஜராஜரின் பிறந்த நட்சத்திரம் என்பது நாம் அறிந்ததே, இந்த திரு நாளில் பற்பல சாதனைகள் புரிந்த மாமன்னன் இராஜராஜ சோழனுக்கு தஞ்சை, திருவிடந்தை, திருவானைக்கோவில் ஆலயங்களில் ஒரு வாரத்திற்கு பெரும் விழா அந்நாளில் நடைபெற்றதாம்.

இதோ சதயவிழா காட்சிகள்

திருவையாறு

2008-11-05T07:24:00.000+05:30

தஞ்சையிலிருந்து ஏறத்தாழ 15 கி.மீ. தூரத்தில் பெரம்பலூர் செல்லும் வழியில் வடவாறு, வெண்ணாறு, வெட்டாறு, குடமுருட்டி ஆறு ஆகிய ஆறுகளை கடந்து சென்றால் காவிரி ஆற்றங்கரையில் அமைந்திருக்கும் அழகிய ஊர் திருவையாறு. ஆரூரில் பிறந்தால் முக்தி, அண்ணாமலையை நினைத்தால் முக்தி, ஐயாறு மண்ணை மிதித்தால் முக்தி என்று சொல்லும் அளவுக்கு மிகவும் பெருமை வாய்ந்த ஊர். இயற்கை அன்னை என்றென்றும் பசுமை ஆடை அணிந்து பார்ப்போரின் உள்ளத்தை கொள்ளை கொள்ளும் அழகான ஊர்.

இந்த ஊரில் உள்ள அய்யாரப்பரும், அறம்வளர்த்த நாயகியும் எழுந்தருளியுள்ள சிவாலயம் மிகப் பழமையான பெருமைவாய்ந்த ஒன்று. சுயம்புலிங்கம் உடைய இந்த ஆலயம் மிக சக்திவாய்ந்ததும் கூட. இங்குள்ள லிங்கம் சுயம்புவானதால் அபிஷேகம் கிடையாது, புனுகு சாற்றுதல் மட்டும்தான். இந்த தலத்தின் வரலாற்றை தனி பதிவில் பார்க்கலாம்.

இங்கு சித்திரையில் நடைபெறும் ஏழூர் வலம் எனும் விழா வெகு சிறப்பாக நடைபெறும், சிவபெருமான் கண்ணாடி பல்லக்குகளில் ஏறி திருவையாற்றில் ஆரம்பித்து திருப்பழனம், திருவேதிக்குடி, திருச்சோற்றுத்துறை, திருக்கண்டியூர், திருப்பூந்துருத்தி மற்றும் திருநெய்த்தானம் ஆகிய ஆலயங்களுக்கு சென்று திரும்புவார். இந்த விழாவிற்கு பல ஊர்களிலிருந்து வரும் பக்தர்கள் ஏராளமானோர் கலந்து கொண்டு, கொளுத்தும் வெயிலிலும் ஐந்தெழுத்தை உச்சரித்து திருமுறைகளை பாடிக்கொண்டு பரவசத்துடன் பரமனை தொடர்ந்து செல்வார்கள். பக்தர்களுக்கு வழிநெடுகிலும் உணவும், நீரும், மோரும் தாராளமாய் கிடைக்கும்.

ஆடி அமாவாசை அன்று நடைபெறும் அப்பர் கயிலாயக் காட்சித் திருவிழாவும் வெகு சிறப்பாக நடைபெறும். மேலும் ஒரு சிறப்பு ஆண்டுதோறும் நடைபெறும் தியாகராய ஆராதனை சங்கீத திருவிழா.

இதோ அய்யாரப்பனின் ஆலயம் தங்களுக்காக...

ஆலயத்தின் முதன்மை கோபுரம்

மனதை மயக்கும் பிச்சாண்டவர், ஆறுமுகர், காரைக்காலம்மை பல ஆடல் நங்கைகள் மற்றும் ஒரு காதல் ஜோடி

பாற்கடல் கடைந்து வரும் ஆலகாலத்தை அள்ளிப் பருகும் நீலகண்டர், கண்டத்தை பிடிக்கும் அன்னை, காலனை அழித்து பக்தரை காக்கும் ஈசன்

அழகாய் காலுயர்த்தி ஆடும் சிவன்

தோடு சூடும் இறைவன் - ஊர்த்துவதாண்டவர், குழலூதும் கண்ணன், பள்ளி கொண்ட அரங்கன், நடராசன், அட இதென்ன பள்ளி கொண்டானுக்கு மேலே காதலர்களா...

எவ்வளவு பெரிய உருவம் பீமனா? அல்லது கடோத்கஜனா..

வாருங்கள் ஆடலரசிகளே! வாருங்கள் நடன ராணிகளே! என்ன கல்கி நினைவிற்கு வருகிறாரா! ஆம் அதே திருவையாறு நடன மாதர்கள்தான் போலும்

தலையலங்காரத்திற்கு இந்த பூ போதுமா! (சும்மா ஒரு கற்பனைதான்)

தியான மண்டபத்தில் உள்ள இந்த மாதர் யாரோ...

வேட்டைக்கு போறார் போலிருக்குது...

இதே போன்ற சிற்பங்களை தஞ்சையிலும் காணலாம்

யார் இந்த மயிலேறும் பெருமான்...

குண்டோதர பூதம்

குமரனுக்கு பட்டம் சூட்டுகிறாரோ பரமன் ...

யாளியின் வாயில் சிற்பம் (இதன் உயரம் சுமார் 12 செ.மீ)

ஆடலும், பாடலும் - மிகச் சிறிய சிற்பங்கள்

இது யார், கல்யாணக் கோல சுந்தரரோ...

தல விருட்சம் - வில்வ மரம்

துர்கை அம்மன், பாவம் பூசி மெழுகிவிட்டார்கள். அனேகமாய் அடுத்த திருப்பணியில் காணமல் போய்விடுவார்

இந்த யானைத் துதிக்கையை பதம் பார்க்கும் யாளிக்கும் அதே கதிதான்...

நண்பர்களே,
இங்கு மனதை உறுத்திய இரண்டு விடயங்களில் ஒன்று ஆலயத்திருப்பணி செய்தால் ஆதீனத்திற்கு ஏதேனும் தீங்கு நேரும் என்று தள்ளிப் போட்டு வருவது, இரண்டாவது இங்கு இருக்கும் அழகிய சிற்பங்களுக்கு வண்ணம் அடிப்பது மற்றும் காரை பூசி மறைத்துவிடுவது.

ஈழத் தமிழர்க்காக இறைஞ்சிடுவோம்

2008-10-23T23:13:00.000+05:30

மாற்றுத்துணி எடுக்க மறந்து

சொத்து சுகம் தனை துறந்து

சொந்தங்கள் யாவும் இழந்து

சோற்றுக்கும் வழியின்றி

நோய் தீர்க்க மருந்தின்றி

தாய் மண்ணிலேயே அகதியாய்

சேயிழந்த தாய்களோடு

தாயிழந்த சேய்களோடு

இரத்தச் சேறு படிந்த உடைகளோடு

யுத்தப் பகை தந்த வெறுப்போடு

சொச்ச சொந்தம் காக்கும் துணிவோடு

உயிர் காக்கும் சோதரர்களுக்காக

அதிகாலை விழித்தெழுந்து

எண்ணெய் நன்றாய் தேய்த்துக்கொண்டு

கங்கை நீரால் குளித்துவிட்டு

கடவுளரை மனதில் நினைத்து

தீபங்கள் ஒளிரச் செய்வோம்

உற்றார் உறவினர் நண்பர்களோடு

அண்டை அயலார் ஒன்று கூட

ஈழத் தமிழர்க்காக இறைஞ்சிடுவோம்

இயன்றவரை உதவிடுவோம்

ஒற்றுமை உணர்வுகள் ஓங்கிட

நல்லெண்ணங்கள் நாளும் வளர்ந்திட

பகையுணர்வு மாறி நட்பு வளர்ந்திட

அழகு ஈழம் மீண்டும் செழித்திட

ஆண்டவனை வேண்டிடுவோம்

ஈழத்தமிழர் மகிழ்ச்சியை மீட்டி

தினமொறு தீபாவளி கொண்டாடுவோம்

தீபாவளி

2008-10-23T20:29:00.000+05:30

அதிகாலை விழித்தெழுந்து

எண்ணெய் நன்றாய் தேய்த்துக்கொண்டு

கங்கை நீரால் குளித்துவிட்டு

கடவுளரை மனதில் நினைத்து

தீபங்கள் ஒளிரச் செய்வோம்

வெடிகள் வெடித்து மகிழ்ந்திடுவோம்

உற்றார் உறவினர் ஒன்று கூட

அண்டை அயலார் மனம் நெகிழ

இனிப்புகள் பகிர்ந்து மகிழ்ந்திடுவோம்

இனிய தமிழால் வாழ்த்திடுவோம்

ஒற்றுமை உணர்வுகள் ஓங்கிட

நல்லெண்ணங்கள் நாளும் வளர்ந்திட

உள்ளிருள் மறைந்து ஒளி பெற்றிட

அண்டமெங்கும் அன்பு மலர

உயிர்களெல்லாம் இன்புற்றிருக்க

உலகாளும் இறைவனை வேண்டி

தினம் ஒரு தீபாவளி பெற்றிடுவோம்

தீபங்கள் ஒளிரட்டும்

தீய எண்ணங்கள் அழியட்டும்

நன்மை நாளும் பெருகட்டும்

நாடும் வீடும் செழிக்கட்டும்

என் உளம் கனிந்த தீபாவளி நல்வாழ்த்துக்கள்

திருவிடைக்கழி (Thiruvidaikkazhi)

2008-09-18T22:47:00.000+05:30

குன்றிருக்கும் இடம் மட்டும் குமரன் இருக்கும் இடமல்ல, குரா மரம் (Webera corymbosa, Bottle brush tree) இருக்கும் இடமும் குமரன் இருக்கும் இடமே. இந்த திருக்கோவில் திருக்கடையூர் இருந்து 6 கி. மீ. தூரத்தில் உள்ளது. சூரபத்மன் வதம் செய்தபின் சுறா வடிவமெடுத்து மறைந்த சூரபத்மனின் புதல்வன் இரண்யனை வதம் செய்து தன் மீதான சாபம் தீர ஈசனை நோக்கி தவம் செய்த இடம் இந்த திருக்கோவில். தவத்திற்குபின் தோன்றிய ஈசன் முருகனும் தானும் வேறில்லை என்றருளி குமரனை முன்னிறுத்தி தான் பின்னிற்கும் தலம். இங்கு மூலஸ்தானத்தில் சிவலிங்கம் பின்புறம் இருக்க ஆறடி உயரம் கொண்ட அழகு முருகன் சிலை முன்னிற்கிறது.

இந்த தளத்திற்கு மற்றொரு சிறப்பும் உண்டு, இங்குதான் தெய்வானைக்கும் முருகப்பெருமானுக்கும் நிச்சயதார்த்தம் நடந்ததாம். இதற்கு சான்றுபோல் தெய்வானை சந்நிதியில் உள்ள அவரின் சிலையில் முகம் முருகப்பெருமானை நோக்கி சற்றே நாணத்துடன் தலை சாய்த்து இருப்பதுபோல் காணப்படுகிறது.

இத்தளத்தின் தல விருட்சம் குரா மரம், இந்த மரத்தின் இலைகளுக்கு விஷமுறிவு சக்தி இருப்பதாக கருதப்படுகிறது.

மிகவும் அமைதியான ஆலயம், எனக்கு மிகவும் பிடித்தமான ஆலயமும் கூட, இங்குள்ள அர்ச்சகரும் மிக நல்ல முறையில் சேவை செய்துவருகின்றார்.

முன் கோபுரம்

குமரன் தன் சாபம் நீங்க தந்தையை பூசிக்கிறார்

இது பத்மாசூரன் வதைபடும் காட்சி , ஒரு பக்கம் சேவலாகவும் மறு பக்கம் மயிலாகவும் மாறிய பத்மாசுரன்...

பழம் நீயப்பா ஞான பழம் நீயப்பா, முருகா இதோ நீ கேட்ட ஞானப்பழம்...

சுறாமீனாக மாறிய இரண்யனை வதைக்கும் வில்லேந்திய வேலன் ...

ஆனந்த கூத்தாடும் நாதா தில்லை அம்பலவாணா...

காயாத கானகத்தே மேயாத மான்... மேயாத.... வள்ளியை வசப்படுத்த வரும் வேட வேடமணிந்த வேலன்...

இது அகத்தியரா அல்லது அருனகிரியா?? அட இது என்ன பச்சை கிளி அருகில் இது நிஜக்கிளி... கிளி வடிவம் எடுத்த கலிகால அருணகிரியோ...

கணபதி அக்ரஹாரம் (Ganapathi Agraharam)

2008-09-03T08:40:00.000+05:30

கணபதி அக்ரஹாரம் இந்த ஆலயம் திருவையாறில் இருந்து 9 கி.மீ தொலைவில் சுவாமிமலை செல்லும் பாதையில் அமைந்துள்ளது. இந்த ஆலயத்தின் கணபதி அகத்திய முனிவரால் பிரதிஷ்டை செய்யப்பட்டது என்றும் மேலும் ஒரு காலத்தில் இருந்த பெரும் பஞ்சத்தை நீக்க கவுதம முனிவரால் பூசிக்கப்பட்டு பஞ்சம் தீர்ந்து வளம் பெற்றதாகவும் தல வரலாறு கூறுகின்றது. இந்த ஆலயம் கணபதிக்காண தனி ஆலயம், இங்கு சங்கடஹர சதுர்த்தி முதலான நாட்களில் சிறப்பு பூசைகள் நடைபெறும் இந்த நாட்களில் இந்த ஆலயத்தை சுற்றி இருக்கும் கிராமங்கள் மற்றும் நகரங்களில் இருந்தும் ஏராளமான பக்தர்கள் கணபதியின் அருளைபெற கூடுவர்.

வினாயகனே விக்கினங்களை தீர்ப்பவனே
வல்லமை தரும் கடவுளே
செல்வங்கள் தரும் நாயகனே
ஆணவம் அகற்றும் ஆண்டவனே
உன்னை உளமாற வழிபடுகிறோம்
உலகை காக்க வேண்டும் கணநாதா

மரத்தால் செய்யப்பட்ட கணபதி உருவங்கள்

ஆடல் அழகன் அடியார்களுடன்

தட்சிணாமூர்த்தி மற்றும் வேலவர்